Dıplomattar qazaqstandyq tóraǵalyq baǵdarlamasynyń sapaly daıyndalǵanyna nazar aýdardy. Atap aıtqanda, Reseıdiń Turaqty ókili Vasılıı Nebenzıa «Keńes músheleriniń ishinen Qazaqstandy eń jaqsy tanıtyn» reseılik tarap, tarıhı faktor men dástúrli qazaqstandyq-reseılik ózara tyǵyz qatynastardy eskere otyryp, «qazaqstandyq delegasııanyń Keńes Tóraǵasy retindegi jumysynyń sáttiligine senimdi» ekenin bildirdi. Reseılik dıplomat 18 qańtarda Qazaqstan Prezıdenti Nursultan Nazarbaevtyń qatysýymen ótetin BUU QK-niń «Jappaı qyryp-joıý qarýyn taratpaý: senim sharalary» taqyrybyndaǵy joǵary deńgeıli brıfıngine Reseı Syrtqy ister mınıstri Sergeı Lavrov qatysatynyn habarlady. AQSh Turaqty ókili Nıkı Heılı men Keńeske múshe basqa elderdiń elshileri senim sharalary arqyly taratpaýdyń ózekti máselelerin jáne Keńes qyzmetiniń kún tártibinde Ortalyq Azııa men Aýǵanstan boıynsha mınıstrler deńgeıindegi pikirtalasty qamtıtyn Qazaqstannyń qańtardaǵy baǵdarlamasynyń mazmundylyǵy men qanyqtyrylǵandyǵyn atap ótti.
Sol kúni Qazaqstan bastamasymen BUU tarıhynda tuńǵysh ret BUU Qaýipsizdik Keńesine jańadan saılanǵan turaqty emes alty músheleri - Kot d’Ivýardyń, Ekvatorııalyq Gvıneıanyń, Kýveıttiń, Nıderlandtyń, Perý men Polshanyń týlaryn kóterý saltanatty rásimi ótti. Is-sharaǵa Perýdiń Syrtqy ister mınıstri Rıkardo Lýna qatysty. Bul rásim BUU men QK múshe-elderiniń, álemdik BAQ, BUU qurylymdarynyń jáne memlekettik emes uıymdardyń ókilderiniń anaǵurlym sanyn jınady. Kóptegen delegasııalardyń pikirinshe, osy is-shara BUU-nyń jańa dástúriniń basy retinde qalyptasyp, qazaqstandyq tóraǵalyqtyń bastalýynyń jarqyn «vızıt kartasy» retinde qabyldandy. Bul qadamnyń jańashyldyǵymen qatar, beıbitshilik pen qaýipsizdiktiń halyqaralyq problemalaryn sheshý boıynsha dúnıejúzilik qaýymdastyq aldyndaǵy Keńestiń jańa músheleriniń joǵary jaýapkershiligin ereksheleıtin onyń tereń sımvolızmi atalyp ótti. Bastama BUU Qaýipsizdik Keńesindegi qazaqstandyq tóraǵalyq murasynyń elementi retinde qarastyrylýda. Máselen, Ekvatorııalyq Gvıneıa turaqty ókiliniń málimdeýinshe, onyń delegasııasy osy dástúrdi bekitip, kelesi jyldyń qańtarynda óziniń tóraǵalyǵy barysynda osy rásimdi qaıtalaıtyn bolady.
Keńestiń qańtardaǵy baǵdarlamasy resmı túrde QK músheleriniń otyrysynda bekitildi, odan keıin ol Qazaqstannyń Turaqty ókili Qaırat Omarovtyń jeke brıfıngi sheńberinde BUU múshe elderiniń nazaryna usynyldy. Kezdesýge qatysqan delegasııalar Qazaqstandy QK tóraǵasy laýazymyna ornalasýymen quttyqtap, aldaǵy jumysta tabys tiledi. Birqatar memleketter, onyń ishinde Marokko, Chılı, Kolýmbııa men Tájikstan qazaqstandyq tarap óz tóraǵalyǵy sheńberinde ótkizýge kózdegen jappaı qyryp-joıý qarýyn taratpaý jáne qaýipsizdik pen damýdyń ózara táýeldiliginiń úlgisi retindegi Aýǵanstan men Ortalyq Azııadaǵy óńirlik áriptestikti qurý máseleleri boıynsha is-sharalardyń ózektiligin atap ótti. Q. Omarov múshe elderdiń Qazaqstan tóraǵalyǵynyń jumys baǵdarlamasy boıynsha kóptegen suraqtaryna jaýap berdi.
Tóraǵalyq etýshi eldiń turaqty ókili Q. Omarov dástúrli baspasóz konferensııasy barysynda BUU janynda akkredıttelgen tilshilerdi qazaqstandyq tóraǵalyqtyń basymdyqtarymen jáne de Keńestiń qańtar aıyndaǵy jumys baǵdarlamasymen tanystyrdy. Memleket basshysy N. Nazarbaevtyń qatysýymen ótkiziletin senim sharalary arqyly taratpaý salasyndaǵy joǵary deńgeıdegi is-sharalar, solardyń ishinde Soltústik Koreıadaǵy, Irandaǵy, Palestınadaǵy ahýal boıynsha jáne de Ierýsalım mártebesi, Mıanmadaǵy jaǵdaı álemdik buqaralyq aqparat quraldary ókilderiniń qyzyǵýshylyǵyn týdyrdy. Sırııaǵa, Iemendegi gýmanıtarlyq ahýalǵa, klımattyń ózgerýine, Qazaqstannyń «jasyl tehnologııalar» salasyndaǵy bastamalary men jasampazdyǵyna qatysty suraqtar qoıyldy. Álemniń Al-Arabiya, The Huffington Post, The Associated Press, Agence France Presse, CBS, FOX News, Nikkei, Mainichi, Fiji TV, Tokyo Shimbun, NHK jáne basqalary tárizdi jetekshi BAQ-tarynyń tilshilerine jahandyq kún tártibindegi basty máseleler boıynsha Elbasynyń bastamalary aıasyndaǵy Qazaqstannyń ustanymy boıynsha naqty jaýaptar berildi.
Jalpy Qazaqstannyń BUU Qaýipsizdik Keńesindegi tóraǵalyǵynyń birinshi jumys kúni jemisti ótip, elimizdiń jáne Prezıdenti N.Nazarbaevtyń halyqaralyq joǵarǵy bedelin jáne qurmetin taǵyda aıǵaq etti.
