Kólik demekshi, mundaı temir tulparlardyń qyzmet etý merzimi – 6 jyl. Buǵan deıin jedel járdem qyzmetkerleri 2015 jyly 37 jańa avtokólikke ıe bolǵan edi. Shymkent qalasyndaǵy medısınalyq qurylǵylar men tehnıkalardy óndirýshi otandyq «KAZMEDPRIBOR Holding» kompanııasynda qurastyrylǵan «GAZel» markaly bul temir tulparlardyń ortasha quny 19 mıllıon teńgeni quraıdy eken. Atalǵan 35 kólik lızıng júıesi boıynsha 3 jylǵa alyndy. Naýqasqa kómek kórsetýge barlyq múmkindik bar. Olaı dep otyrǵanymyz basym bóligi reanımobıl sanalatyn kólikter jedel járdem qyzmetkerlerine qajet jabdyqtarmen 100 paıyz qamtamasyz etilgen. Sondaǵy 8 kólik «GAzel Bıznes» negizinde bolsa, qalǵan 27-si – «GAzel Next».
Taǵy bir aıta keterligi, óńirimizde 5 jedel járdem brıgadasy oba, tyrysqaq, kúıdirgi syndy asa qaýipti juqpaly aýrýlarmen kúresedi. Olarǵa arnalǵan kólikter de erekshe jabdyqtalǵan. Sóıtip, buǵan deıingi kólikterdiń jylytqyshy mardymsyz, muzdatqyshy múlde joq bolsa, keıingi 35 kólikte bul olqylyqtardyń orny tolypty.
– Ár adamnyń basty baılyǵy – densaýlyq. Bul rette turǵyndarymyzdyń jaǵdaıyn jaqsartý úshin barymyzdy salyp kelemiz. Prezıdent tapsyrmasyn oryndaı otyryp, jańa aýrýhanalar turǵyzyp, jańa tehnologııalardy qoldanysqa engizip, zamanaýı qondyrǵylardy satyp alýdamyz. Mine, búgin biz jańa jyl qarsańynda 35 kólikti el ıgiligine paıdalanýǵa usynyp otyrmyz, – dedi Erlan Qoshanov.
Mıras ASAN,
«Egemen Qazaqstan»
Qaraǵandy oblysy
