Astananyń qoǵamdyq kólikterinde Astana qalasynyń jolaýshylar kóligi basqarmasynyń basshysy Bekmyrza Igenberdınovtyń bastamasymen quqyq buzýshylardy anyqtaý maqsatynda reıdtik is-sharalar júrgizilip jatyr. Kóliktik baqylaý departamenti «Astana LRT» JShS men Astana qalasy IID-niń jergilikti polısııa qyzmeti birlesip uıymdastyryp jatqan shara qalalyq baǵdarlardyń barlyǵyn qamtıdy.
«Reıd kúnderi qoǵamdyq kólikte júrgeni úshin tólemniń júzege asý faktisin tekseretin kóliktik baqylaý departamentiniń jumysy kúsheıtiledi. Jolaqysyn tóleýden jaltarǵandyǵy úshin jaýapqa tartý jóninde halyqty aqparattandyrý, qoǵamdyq kólikte bıletsiz júrgen azamattardy anyqtaý, jolaqysyn tóleýden jaltarý faktileriniń jáne qoǵamdyq kólikterdegi jolaqysyn tóleýge qatysty basqa da quqyq buzýshylyqtardyń aldyn alý atalmysh aksııanyń maqsaty bolyp tabylady», - delingen «Astana LRT» JShS-niń habarlamasynda.
Eske salaıyq, 2018 jyldyń 1qańtarynan bastap Astananyń barlyq baǵdarly kólik quraldary jolaqysyn tóleýdiń elektrondy júıesimen jabdyqtalǵan. Budan buryn qoldanylǵan jyrtylmaly orama bıletter endi berilmeıdi. Budan bylaı jolaýshylar aqshalaı tólemdi júzege asyrǵan jaǵdaıda, bıletterdi jolaqysyn tóleýdiń elektrondy júıesi arqyly alady. Sonymen qatar, jolaýshylardyń kóliktik kartanyń kómegimen de jolaqysyn tóleý múmkindigi bar. Ol úshin jolaýshy kartasyna aldyn ala aqsha quıyp alýy tıis.
2018 jyldyń basynan 5 jolaýshyǵa qoǵamdyq kólikte bıletsiz júrgeni úshin ákimshilik aıyppul salyndy.
Qoǵamdyq kólikte jolaqysyn tólemegenderge jergilikti polısııa qyzmeti 2 aılyq eseptik kórsetkish (AEK) kóleminde ákimshilik aıyppul salady. Ol 4810 teńgeni quraıdy.
«Astana LRT» JShS-de belgili bolǵandaı, mundaı aksııalar júıeli túrde ótkiziledi dep josparlanýda.
Munymen qosa, reıd barysynda jolaýshylardyń bıletsiz júrýine múmkindik bergen 15 kondýktor anyqtalǵan bolatyn. Mundaı áreketi úshin kondýktorlarǵa 5AEK kóleminde, ıaǵnı 12025 teńge aıyppul salynady.
