Aıaýlym poıyzdan túse salysymen ákesi Serikti qushaqtaı aldy. Tórt jasynan sporttyń asa bir kúrdeli túri – frıstaıldyń mogýl túrine baýlyǵan ákesi Serik pen anasy Gaýharııa degende qyzdarynyń shyǵarda jany bólek. Olar erinbeı-jalyqpastan qalanyń syrt jaǵyndaǵy taýǵa aparyp, birneshe saǵattan keıin keri alyp qaıtyp júrdi. Oıyn balasy emes pe, ábden sharshaǵan kezde sportty tastap ketpekshi bolǵan kezde ata-anasy jigerin janyp, namysty qaıraı túsetin. Qazaq qyzdary bara bermeıtin asa qaýipti de kúrdeli sportpen shuǵyldanǵan 12 jylda Aıaýlym talaı asýdan ótti.
2011 jyldyń naýryzy. О́skemenniń irgesindegi «Altaı alpisi» shańǵy bazasynda eresekter men jasóspirimder arasynda frıstaıldan el chempıonaty ótti. Erler arasyndaǵy saıysta Dmıtrıı Reıherd, Dmıtrıı Barmashov, al qyzdar arasyndaǵy jarysta Iýlııa Galysheva, Iýlııa Rodıonova aldaryna jan salmady. Qazaqstan Respýblıkasynyń I jastar oıynynda Aıaýlym mogýldan juptasýda altynnan alqa taqsa, frıstaıl-mogýlda ekinshi, al frıstaıl-akrobatıkadan úshinshi oryndy ıelendi. Qarshadaı qyz bıikten tómen qaraı zýlaǵan kezde boıyndaǵy qorqynyshty ysyryp qoıyp, áýede birneshe salto jasady, joǵary balǵa ıe boldy. Jarysty tamashalap turǵan ata-anasy Serik pen Gaýharııa, týystary Marat pen Gúlmıra Ormanbetovter Aıaýlymdy jeńisimen quttyqtap, betinen súıdi.
– Qyzymyz aıaǵyna shańǵy baılaǵan kezde nebári úsh, al frıstaıl seksııasyna jazylǵan kezde tórt jasta bolatyn, – deıdi ákesi Serik Ámirenov. – Frıstaıldyń mogýl túrin tańdaǵan kezde qobaljyǵanymyz ras. Biraq Aıaýlym qaısar, alǵan betinen qaıtpaıtyn ójet bolyp ósti. Alǵashqy bapkeri Sergeı Pavlovıch Aksenov bilgenin úıretti. Seksııaǵa jazylǵan kezde 80 bala bolǵan, onyń tórteýi ózimizdiń qarakózder. Aqyry sol 80 balanyń tórtten biri ǵana qaldy. Qazir ózimen birge 12-13 jastaǵy Orynhan Muqataev, Ámına Satenova, 17 jastaǵy Oljas Beısembaev frıstaılmen shuǵyldanyp, jaqsy nátıjelerge jetýde. Qazaq qyzdarynyń sporttyń kúrdeli túrin tańdaýy – quptarlyq is. Buǵan deıin qyzymyz birneshe ret Eýropa kýbogy kezeńine qatysyp, 6-shy oryndy ıelengen. Tipti 8, 10-shy oryndarǵa taban tiregen kezde kúızelgeni ras. Oǵan jiger berip, áli jassyń, jeńisti kúnderiń alda, – dep jiger beretinbiz. Endi, mine, alǵashqy jeńisine jetti.
– Aıaýlymdy ákesi ekeýimiz birneshe jyl jattyǵýlarǵa birge aparyp júrdik, Seriktiń Zaısanda sharýa qojalyǵy bar, ol joq kezde men qamqor boldym. Qyzymnyń boıyndaǵy frıstaılǵa degen súıispenshilik meni tánti etti. Odan úmit kútemin, – deıdi anasy Gaýharııa.
Almatyda stýdent-jastardyń Ýnıversıada oıyndary ótip jatqan kezde Serik habarlasyp, «aǵa, súıinshi, Aıaýlym Eýropadan oralǵan soń Japonııanyń Sapporo qalasynda jalaýyn kóteretin Azııa oıyndaryna qatysatyn boldy, men de baryp, qyzyma jankúıer bolamyn», degen edi. Alaıda sport basshylary Aıaýlymnyń ornyna Iýlııa Galyshevany jiberýdi jón sanaǵan. Soǵan qaraǵanda, ne jasy tolmady nemese mamandar Qazaqstan qorjynyna medal túsirýdi kózdegen syńaıly. Alaıda nebári 16 jastaǵy, О́skemendegi daryndy balalarǵa arnalǵan sport mektebiniń 11-synyp oqýshysy Aıaýlymnyń alar asýy áli alda.
– 2017 jyl men úshin tabysty boldy. 25 qańtarda bizdi Fransııanyń Albıez qalasyndaǵy Eýropa kýbogynyń kezekti kezeńine elimizdiń jastar quramasynyń aǵa bapkeri Vıktor Reıherd bastap apardy. Jartylaı fınalda Almanııanyń eń tanymal frıstaılshysy Sofı Vazamen jolymyz túıisip, ony eńserdim. Al aqtyq synda brıtanııalyq Gargen Shofıl Makaıa menen sál ǵana ozyp ketti. Onyń aldynda jeke saıysta qolaǵa ıe bolǵanmyn. Juptasyp óner kórsetýde kúmis medal qolǵa tıdi. 11-12 aqpanda Aýstrııanyń Krıshpel qalasynda da Eýropa kýbogy jarysy ótip, oǵan 15 eldiń ataqty sańlaqtary qatysty. Jeke jáne juptasýda 2 altynǵa ıe bolǵan kezde qýanyshymdy birden ata-anama jetkizdim. Shveısarııanyń Prato-Leventıno qalasynda jalaýyn kótergen Eýropa kýbogynyń kezekti kezeńinde de namysty qoldan bermeı, 1 altyn alqany oljaladym, – deıdi Aıaýlym Ámirenova.
– Byltyr taǵy qandaı jarystarǵa qatystyń?
– О́tken jyldyń 8-9 naýryzynda Ispanııanyń Sıera-Nevada qalasynda jalaýyn kótergen frıstaıldan eresekter arasyndaǵy álem chempıonatyna qatystym. Shvesııa men Fınlıandııadaǵy Eýropa kýbogynyń kezekti kezeńderine qatysyp, sheberlikti shyńdaı tústim. Sanaýly kúnnen keıin Ońtústik Koreıanyń Phenchhan qalasyndaǵy Aq Olımpııa oıyndaryna óskemendik talantty frıstaılshy Iýlııa Galysheva ekeýimiz qatysatyn boldyq. Ádette ár memleketten Aq Olımpıadaǵa lısenzııany ıelengen 4 sańlaq qatysa alady, qazirdiń ózinde D.Reıherd, P.Kolmakov jáne Iý.Galyshevanyń joldamalary qaltada. Tek ony qorǵaýlary tıis. Men kvota boıynsha qatysamyn, biraq lısenzııany qorǵaýym kerek. Alda 6 qańtarda Kanadada, sosyn AQSh-ta, budan keıin taǵy da Kanada men Amerıkada ótetin álem kýbogynyń kezekti kezeńine qatysamyz. Qazaq eliniń jankúıerlerine qýanysh syılaý maqsatym, – deıdi 16 jastaǵy chempıon qyz.
– Aıaýlymnyń boıyndaǵy jeńiske degen ynta-jiger, kúsh-qýaty bizdi qýantady. Onyń boıynda frıstaılshyǵa qajet ójettilik pen tez sheshim qabyldaý, kúrdeli qımyl jasaý kezindegi tapqyrlyq qasıetteri úılesim taýyp tur. Koreıada Aıaýlym mol tájirıbe jınaıdy, keleshekte qazaq eliniń namysyn qorǵaıdy degen oıdamyz, – deıdi elimizdiń jastar komandasynyń aǵa bapkeri Vıktor Aleksandrovıch Reıherd.
Ońdasyn ELÝBAI,
jýrnalıst
О́skemen
