Foto: inform.kz
– Aıdos Ydyrysuly, Memleket basshysynyń Baspasóz hatshysy retinde Siz Qazaqstan Prezıdentiniń jumys kestesinen udaıy habardarsyz. Jaqynda ǵana Siz Nursultan Nazarbaevtyń aldaǵy josparlarymen bólisken edińiz. Sizdiń oıyńyzsha, aldaǵy kúnderdegi eń mańyzdy oqıǵa ne bolmaq?
– Álbette, Memleket basshysynyń qyzmetindegi negizgi oqıǵa AQSh-qa resmı sapary bolady. Osy sapar aıasynda joǵary deńgeıdegi kelissózder ótedi dep kútilýde. Nursultan Nazarbaevtyń AQSh Prezıdenti Donald Tramppen kezdesýiniń kún tártibinde de keń aýqymdaǵy máseleler belgilengen. Bunda odan arǵy ekijaqty saıası damý, saýda-ekonomıkalyq ózara árekettestikter, Qazaqstan ekonomıkasyna amerıkalyq ınvestısııalardy tartý máselelerine erekshe nazar aýdarylady. Budan bólek, BUU Qaýipsizdik Keńesine elimizdiń tóraǵalyǵy aıasynda Memleket basshysy atalǵan Keńestiń otyrysyna qatysyp, osynaý jahandyq organda sóz sóıleıtin bolady. Tutastaı alǵanda, bul tarıhı sapardyń baǵdarlamasy mańyzdy sharalarǵa toly. Qazaqstan Prezıdentiniń amerıkalyq jetekshi saıasatkerlerimen jáne bıznes ókilderimen kezdesýi de josparlanǵan. Osyǵan baılanysty QR Prezıdentiniń baspasóz qyzmeti tarıhı sapardyń barysy men nátıjelerinen aqparattar usynatynyn atap ótkim keledi.
– Qazaqstan Prezıdentiniń AQSh-qa resmı saparynan qandaı ekonomıkalyq tıimdilik kútýge bolady?
– Sapar qorytyndysy boıynsha eki memleket prezıdentteriniń keńeıtilgen strategııalyq áriptestik týraly Birlesken málimdemesi qabyldanady dep kútiledi, onda HHI ǵasyrdaǵy qazaqstandyq-amerıkalyq baılanystardy odan ári tereńdetý máseleleri qamtylady. Sonymen qatar, kelissózder aıasynda birneshe mıllıard dollardy quraıtyn birqatar kelisimge qol qoıý josparlanǵan. Amerıkalyq kapıtaldyń qatysýymen júzege asatyn birlesken jobalar Qazaqstan ekonomıkasynyń ártúrli salalaryn qamtıdy. Memleket basshysynyń AQSh-qa resmı sapary ekijaqty qarym-qatynastarǵa jańa serpin berip, oǵan uzaqmerzimdi oń dınamıka qalyptastyrady dep oılaımyn.
– Bıylǵy jyldyń qańtarynan bastalǵan Qazaqstannyń BUU Qaýipsizdik Keńesine tóraǵalyǵynyń mánine toqtalyp ótseńiz?
– Bul oqıǵa elimizdiń halyqaralyq arenadaǵy mártebesi men bedelin kóteredi. Bul - bizdiń dıplomatııamyz úshin de baǵa jetpes tájirıbe, osy arqyly álemdegi jáne óńirlerdegi jaǵdaıǵa áser etetin sheshimder qabyldaý prosesine elimizdiń qatysý múmkindigi týyp otyr. BUU Qaýipsizdik Keńesi komıtetterinde basshylyq jasaý Qazaqstannyń álemniń ártúrli elderimen zamanaýı qaterler men qaýipterge qarsy kúreste ózara is-qımyldy odan ári kúsheıtýine járdemdesetini anyq. Qazaqstan osy arqyly qaýipsizdik salasynyń aǵymdaǵy jahandyq kún tártibin qalyptastyrýǵa, sondaı-aq ortalyqazııalyq óńirdiń asa mańyzdy problemalary men múddelerin halyqaralyq arenada ilgeriletýge tikeleı qatysýdyń jańa múmkindigine ıe bolyp otyr.
– Suhbatyńyzǵa raqmet!
