Sondaı-aq, kún tártibinde ataýly áleýmettik kómektiń jańa formatyn engizý jáne ózin-ózi jumyspen qamtyǵandardy formalızasııalaý, 2018 jyly negizgi maqsatty kórsetkishterge qol jetkizý úshin Energetıka jáne turǵyn úı-kommýnaldyq sharýashylyqty basqarý jumystarynyń josparlary jáne aýyl sharýashylyǵy basqarmasynyń is-sharalar jospary talqylandy.
2017 jyly 1615 otbasy nemese 8052 adam ataýly áleýmettik kómek, balalar járdemaqysyn jáne О́rleý jobasy aıasynda áleýmettik tólemdermen qamtylǵan. Jańa formattaǵy áleýmettik kómekti sapaly engizý úshin osy otbasylardyń jaǵdaıy zerttelip, muqtajdyǵy anyqtaldy.
– Jańa formatta arnaýly áleýmettik kómekti alý mejesiniń ósýine baılanysty (40% tan 50%) aǵymdaǵy jyly 1400 otbasy nemese 7000 adam shartty aqshalaı kómek alýǵa keledi dep kútilýde. Orta eseppen alǵanda bir otbasynan 1,4 % adam jumysqa qabiletti dep eseptep, 1960 adamdy jumyspen qamtýdy josparlap otyrmyz, - dedi Mańǵystaý oblysynyń jumyspen qamtýdy úılestirý jáne áleýmettik baǵdarlamalar basqarmasy basshysynyń mindetin atqarýshy Qýanysh Berishbaev.
Energetıka jáne turǵyn úı-kommýnaldyq sharýashylyq basqarý basqarmasynyń baıandamasyna sáıkes, búginde oblys boıynsha 3 qalalyq eldi meken – 99,8 %, 61 aýyldyq eldimekenniń 64%-y ortalyqtandyrylǵan aýyz sýmen qamtamasyz etilgen. 2017 jyly jalpy quny – 6,1 mlrd.teńge, uzyndyǵy 253,42 km quraıtyn 6 jobanyń qurylys jumystary bastaldy. Jyl aıaǵyna deıin 3 eldi mekendi (Munaıly aýdanynyń Basqudyq selosy, Beıneý aýdanynyń Boranqul jáne Sarǵa selolary) tolyqtaı sýmen qamtamasyz etý jobalary paıdalanýǵa beriledi. Nátıjesinde, 2018 jyly ortalyqtandyrylǵan sýmen jabdyqtaýǵa qoljetimdilik kórsetkishi aýyldyq eldi mekenderde 69 % bolady.
– 2018 jyly jalpy quny – 2,1 mlrd.teńge, uzyndyǵy – 92,1 km. Munaıly aýdanynyń Qyzyltóbe selosyn aýyz sýmen qamtamasyz etý jobasyna – 300,0 mln.teńge qarajat bólindi. Aǵymdaǵy jyly «Nurly jol» baǵdarlamasynyń aıasynda Túpqaraǵan aýdanynyń Fort-Shevchenko qalasynda quny-1,4 mlrd.teńge, uzyndyǵy-61,8 km aýyz sý qubyryn salý jumystary aıaqtalady. Bul joba júzege asyrylǵannan keıin, Fort-Shevchenko qalasy 100% ortalyqtandyrylǵan aýyz sýmen qamtamasyz etiledi, - dedi Energetıka jáne turǵyn úı-kommýnaldyq sharýashylyq basqarý basqarmasynyń basshysy Sapar Amanbekov.
Qazirgi tańda 3 qalalyq eldi meken – 97 %, 61 aýyldyq eldimekenniń 17,1 %-y ortalyqtandyrylǵan káriz júıesimen qamtamasyz etilgen. Oblys boıynsha 3 qalalyq eldi meken – 100 %, 61 aýyldyq eldimekenniń 86,89%-y ortalyqtandyrylǵan gaz júıesimen qamtyldy. Oblystyń damý deńgeıin eskere otyryp, aldaǵy ýaqytta energııa tapshylyǵyn boldyrmaý úshin qýaty 250 MVt bý-gaz qondyrǵysynyń qurylysyn salý jobasyn memlekettik-jekemenshik áriptestik tetigi boıynsha júzege asyrý jumystary júrgizilýde.
Mańǵystaý oblysynda jel jáne kún elektr stansııasynyń qurylysyn salý boıynsha 3 joba júzege asyrylyp jatyr. Onyń ishinde, 2 jobanyń qurylys jumystary 2018 jyldyń 1-toqsanynda (Túpqaraǵan aýdanynyń Aqshuqyr selosynda qýattylyǵy 5 MVt jel elektr stansasynyń qurylysy, Munaıly aýdanynyń Batyr selosynda qýattylyǵy 7 MVt kún elektr stansasynyń qurylysy) jáne 1 jobanyń qurylys jumystary 2018 jyldyń sońyna deıin aıaqtalady (Mańǵystaý aýdanynyń Shetpe selosynda qýattylyǵy 12 MVt kún elektr stansasynyń qurylysy).
Mańǵystaý oblysynyń aýyl sharýashylyǵy basqarmasy 2018 jyly oblystyń basym baǵyttaǵy kókónis, baqsha daqyldaryn shamamen 1200 gektar jerge egýdi jáne oblystaǵy jylyjaılardyń jumysyn jandandyryp, ónim men gektar kólemin ulǵaıtýdy josparlap otyr. 2018 jyly shamamen 2 jylyjaı kólemin (JK «Shandyqul», JK «Búrkitbaev») 1,5 gektardan 3 gektarǵa keńeıtý, 2 jylyjaıdy («Grenhaýs» JShS, «Senek» JShS) iske qosý arqyly oblys turǵyndaryn qoljetimdi kókónistermen qamtamasyz etý, mal sharýashylyǵymen aınalysatyn sharýa qojalyqtary men kásipkerleriniń ótinishi negizinde ketken shyǵyndarynyń 80%-yn sýbsıdııalaý, 60 qudyq qazý qolǵa alynbaq.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
