Osy oraıda Jambyl oblysynyń ákimi Asqar Myrzahmetovtiń qatysýymen «Balasaǵun» ortalyq konsert zalynda aktıv jıyny ótti. Oǵan oblys ákiminiń orynbasarlary, qala jáne aýdan ákimderi, máslıhat depýtattary, basqarma men departamentter, quqyq qorǵaý organdary men joǵary oqý oryndary basshylary, sondaı-aq saıası partııalar, etnomádenı ortalyqtar, úkimettik emes uıymdar men jastar birlestikteri, ekinshi deńgeıli bankter ókilderi qatysty.
– Bıylǵy jyly 10 qańtar kúni Memleket basshysynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýy jarııalandy. Elbasy jańa álem – tórtinshi ónerkásiptik revolıýsııa álemine beıimdelý jolyn kórsetip, jetistikke jetkizetin 10 mindetti usyndy. Bul – Qazaqstan úshin jańa álem kóshbasshylarynyń qataryna qosylý barysyndaǵy jańa múmkindikter, - dedi ákim.
Jıynda oblys ákiminiń birinshi orynbasary Bekbolat Orynbekov óńirde kásiporyndardy avtomattandyrý, eńbek ónimdiligin arttyrý jáne barlyq salaǵa sıfrlyq júıeni engizý maqsatynda jumystar atqarylyp jatqanyn aıtyp ótti. Sonymen qatar, aktıv jıynynda Elbasy Joldaýynda aıtylǵan kólik-logıstıka ınfraqurylymyn damytý, qurylys jáne turǵyn-úı kommýnaldyq sharýashylyǵyna zamanaýı tehnologııalardy engizý, qarjy sektoryn «qalpyna keltirý», nátıjeli jumyspen qamtý, biryńǵaı elektrondyq eńbek bırjasyn keń aýqymda engizý máseleleri talqylandy.
Jambyl oblysy búginde jańa órleý kezeńinde. Joldaý júktegen mindetter aıasynda óńirde ózgerister kóp. Elbasy Joldaýynda deni saý ult qalyptastyrý máselesi aıtylǵandyqtan, aldaǵy ýaqyttarda medısınalyq uıymdarda elektrondy densaýlyq pasporty qurylatyn bolady. Sondaı-aq, oblys kóleminde sozylmaly aýrýlardy basqarý baǵdarlamasy engiziledi. О́z kezeginde tıimdi memlekettik basqarýdy damytý máseleleri de sóz bolyp, oblysta kásipkerlerdiń shyǵyndaryn qysqartý boıynsha qolǵa alynatyn sharalar týraly da aıtyldy.
Elbasy Joldaýynda aıtylǵan «aqyldy qalalar» jobasy Taraz qalasynda engizilmek. Al Sarysý aýdanynyń Jańatas qalasynda «Kásibı jospar» pılottyq jobasy iske asyrylatyn bolady. Jıyn barysynda Joldaýdan týyndaǵan negizgi mindettermen qatar, óńirdiń áleýmettik-ekonomıkalyq damýy úshin qolǵa alynyp otyrǵan birqatar jumystar da naqtylandy. Sonymen qatar, túrli salanyń mamandary jaryssózge shyǵyp, Elbasy Joldaýyna baılanysty pikirlerin bildirdi.
Hamıt Esaman,
«Egemen Qazaqstan»
Jambyl oblysy
