Elbasy Aq úıshe arnaıy shaqyrǵany úshin AQSh Prezıdenti D.Trampqa alǵysyn bildirdi. Qazaqstannyń AQSh-ty senimdi seriktes, áleýetti áriptes sanaıtynyn jetkizgen N.Nazarbaev aldaǵy ýaqytta ekijaqty qarym-qatynasty nyǵaıtýdyń mańyzdylyǵyn atap kórsetti.
«Sizdi AQSh Prezıdenti qyzmetine kiriskenińizge bir jyl tolýymen quttyqtaımyn. Osy ýaqyt aralyǵynda ekonomıkalyq turǵyda tabysty jumys atqardyńyz. Ortalyq Azııadan Aq úıge arnaıy shaqyrylǵan tuńǵysh Prezıdent atanýym eki el arasyndaǵy baılanysty nyǵaıta túsedi. Qazaqstan men AQSh arasynda árdaıym ekijaqty saıası qarym-qatynas ornaǵan. AQSh tarapy alǵashqylardyń biri bolyp Qazaqstannyń táýelsizdigin moıyndady. Sodan bergi 26 jyl ishinde eki el arasyndaǵy baılanys jańa beleske kóterildi. Meniń búgingi saparym ‒ sonyń aıǵaǵy. Aldaǵy áńgime barysynda eki elge de tıimdi máselelerdi talqylaıtynymyzǵa jáne Qazaqstan men AQSh arasynadǵy ekonomıkalyq áriptestiktiń odan ári nyǵaıa túsetinine senimdimin», dedi Elbasy.
О́z kezeginde D.Tramp AQSh tarapy Qazaqstandy Ortalyq Azııa óńirindegi bolashaǵy zor, strategııalyq áriptes dep esepteıtinin málimdedi. Onyń aıtýynsha, Qazaqstan men AQSh arasyndaǵy dıplomatııalyq, saýda-ekonomıkalyq qarym qarym-qatynas jańa sapaǵa ıe bolyp otyr. Aq úı basshysy Qazaqstandy óńirlik beıbitshilik pen qaýipsizdiktiń sheshýshi faktory retinde baǵalaıtynyn jetkizdi.
«Aq úıde Sizdi qabyldaý men úshin úlken abyroı. Buǵan deıin de Saýd Arabııasynda birqatar máselelerdi talqyladyq. Qazaqstan táýelsizdik alǵaly beri kóptegen jetistikterge qol jetkizdi. Qazirgi tańda AQSh ekonomıkasy úlken bir belesti baǵyndyrdy. Afro-amerıkalyqtardyń jumyssyzdyq buǵan deıin bolmaǵan tómen deńgeıge tómendedi», dedi D.Tramp.
Abaı ASANKELDIULY,
"Egemen Qazaqstan"
Arnaıy Vashıngtonnan
Sýretti túsirgen Baýyrjan JÝASBAI
