The Diplomat:
Nursultan Nazarbaev Vashıngtonǵa keldi
Qazaqstan prezıdenti Nursultan Nazarbaev Vashıngtonǵa resmı saparmen kelip, Aq úıde Donald Tramppen kezdesti. Eki prezıdent AQSh pen Qazaqstan arasyndaǵy strtegııalyq áriptestikti damytýǵa kelisti. Kezdesýde saýda men ınvestısııa sekildi ekonomıkalyq máseleler, Aýǵanstandaǵy soǵys pen ıadrolyq qarý týraly taqyryptar aıtyldy.
Nursultan Nazarbaev AQSh-tyń Saýda-óndiristik palatasyndaǵy dóńgelek ústelge qatysyp, Qazaqstannyń tehnıkalyq jańǵyrýy týraly sóılesetinin aıtty. Sonymen qatar ol 20 kommersııalyq kelisimshartqa qol qoıdy. Onyń ishinde Ortalyq Azııada burynnan jumys istep kele jatqan Chevron, ExxonMobil, General Electric jáne Boeing kompanııalarynyń aty atalǵan.
Associated Press:
Tramp Qazaqstan Prezıdentimen Soltústik Koreıanyń ıadrolyq qaýpin talqylady
AQSh Prezıdenti Donald Tramp Qazaqstan Prezıdenti Nursultan Nazarbaevpen birigip Soltústik Koreıanyń ıadrolyq qarýynyń álemge qaýip tóndirmeýine qarsy birlesip kúresetinin jetkizdi.
Kezdesý barysynda Donald Tramp Qazaqstan AQSh-tyń mańyzdy seriktesi ekenin atap ótti.
Nursultan Nazarbaev Qazaqstannyń álemdegi eń iri ıadrolyq arsenaldan bas tartqanyn eske aldy. Onyń aıtýynsha, qazir Qazaqstan Irannyń ıadrolyq baǵdarlamasyn toqtatý týraly kelissózder júrgizip jatyr. Sonymen qatar Qazaqstan Prezıdenti AQSh-pen dıplomatııalyq resmı qarym-qatynasy joq Soltústik Koreıa men Amerıka arasynda deldal bola alatynyn da atap ótti.
Kezdesý barysynda Nursultan Nazarbaev Tramptyń Prezıdent bolyp saılanýyna 1 jyl tolýymen quttyqtady.
XinhuaNet:
AQSh pen Qazaqstan strategııalyq áriptestikti damytpaq
AQSh Prezıdenti Donald Tramp pen Qazaqstan Prezıdenti Nursultan Nazarbaev eki memleket HHI ǵasyrdaǵy ózara strategııalyq áriptestikti odan ári damytýǵa múddeli ekenin aıtty. Onyń ishinde eki el qaýipsizdik, saýda, ınvestısııa, halyqaralyq qatynastar boıynsha saıası qarym-qatynasty nyǵaıtpaq.
Sonymen qatar eki memleket Ortalyq Azııadaǵy problemalardy birlesip sheshý týraly kelisti.
Aq úıdiń habarlaýynsha, prezıdentter ekstremızm men terrorızmge qatysty kúreste de seriktestik qarym-qatynasty damytady.
Bloomberg:
SoHo Hotel Qazaqstan qarjysyna salynǵan ba?
Donald Tramp Qazaqstan Prezıdenti Nursultan Nazarbaevpen kezdesý barysynda Trump SoHo qonaq úıine Qazaqstannan ınvestısııa tartylǵan-tartylmaǵanyn bilmeıtinin aıtty. Sonymen qatar Donald Tramp Qazaqstan Prezıdentimen Aq úıde kezdesý barysynda ony erekshe qurmetteıtinin aıtty.
Tramp 2000 jyldary qazaqstandyq bıznesmen basqaratyn Bayrock Group LLC kompanııasymen jumys istegen.
46 qabatty kondomınıým 2006 jyly ashylyp, 2007 jyldan bastan satylǵan. Byltyr ǵımarattyń Trump Organization lısenzııalyq kelisimin CIM Group jyljymaıtyn múlik kompanııasy satyp alǵan. Sol kezde Trump brendi alynyp, Dominick Hotel retinde jumys isteı bastaǵan.
Reuters:
Qazaqstan Boeing ushaqtaryn satyp alyp, GE jańa lokomotıvterin qurastyrady
Qazaqstan Prezıdenti Nursultan Nazarbaev AQSh-tyń birneshe kompanııasymen 7,5 mln dollar kóleminde 20 kelisimshartqa qol qoıdy. Onyń ishinde Ortalyq Azııaǵa ushaq pen lokomotıv jetkizý týraly kelisim de bar.
"Kelisimshart ishinde Boeing ushaqtaryn alý, Qazaqstanda General Electric kompanııasynyń 900 lokomatıvin qurastyrý qarastyrylǵan", dedi Nursultan Nazarbaev Aq úıdegi kezdesýde. Onyń aıtýynsha, kelisimsharttardyń kóp bóligi aýyl sharýashylyq sektoryna qatysty.
The Wall Streat Journal:
Tramp Aq úıde Qazaq Prezıdentimen kezdesti
Donald Tramp Qazaqstan Prezıdentine Soltústik Koreıanyń ıadrolyq qarý baǵdarlamasyna qarsy kúreste qoldaý bildirgeni úshin alǵys aıtty. Sonymen qatar kezdesýde AQSh Prezıdenti eki memleket arasyndaǵy qarym-qatynastyń joǵary deńgeıde ekenin jetkizdi. Túski astan buryn eki prezıdent jýrnalısterge birlesken málimdeme jasady.
Qazaqstan Prezıdenti Aq úıge buǵan deıin 2006 jyly kelgen.
Tramp AQSh pen Qazaqstannyń aımaqtaǵy beıbitshilik pen qaýipsizdikti nyǵaıtý úshin birlesip jumys istep jatqanyn aıtty. Sondaı-aq BUU Qaýipsizdik Keńesiniń tóraǵalyǵyn bastaǵan Qazaqstanǵa AQSh-tyń Aýǵanstandaǵy kúshterine jáne Soltústik Koreıanyń ıadrolyq qarý baǵdarlamasyna qarsy kúreste qoldaý bildirgeni úshin alǵys bildirdi.
Nursultan Nazarbaev Keńes Odaǵy qulaǵan kezde Qazaqstannyń ıadrolyq qarýdan bas tartqanyn, qazaq halqy ıadrolyq qarýǵa baılanysty taqyryptardy talqylaýǵa moraldyq quqyǵy bar ekenin aıtty. Sonymen qatar Qazaqstan Prezıdenti AQSh pen Reseı qarym-qatynasynyń dınamıkasyn jiti baqylap otyrǵanyn jetkizdi.
Donald Tramp Nursultan Nazarbaevtyń Qazaqstan ekonomıkasyn nyǵaıtý áreketterin, 2050 jylǵa deıin ekonomıkasy damyǵan álemniń TOP-30 elderiniń qataryna qosylý josparyn qoldaıtynyn aıtty. Al Qazaqstan Prezıdenti AQSh salyq kodeksindegi ózgeristerdi qoldaıtynyn aıtyp, "Men mundaı ózgeristerdi 5 jyl buryn jasaǵanmyn" dep atap ótti.
VOA News:
Tramp Qazaqstan prezıdentimen Soltústik Koreıa týraly sóılesti
Vashıngtonǵa resmı saparmen kelgen Nursultan Nazarbaev AQSh-pen geosaıası jáne ekonomıkalyq baılanystardy nyǵaıtý kerektigin aıtty.
Atlant keńesiniń ǵylymı qyzmetkeri K.Merkeldiń aıtýynsha, Donald Tramp pen Nursultan Nazarbaevtyń ortaq taqyryptary kóp. "Qazaqstan táýelsizdik alǵan 26 jyldyń ishinde Ortalyq Azııadaǵy burynǵy Keńes Odaǵyna múshe bolǵan elder arasynda eń strategııalyq jáne ekonomıkalyq mańyzdy memleketke aınaldy. Basqa 5 memleketke qaraǵanda, Qazaqstanda jaǵdaı turaqty. Sonymen qatar bul memleket kómirsýtegine baı jáne Qazaqstan jastardyń bilimine kóp kóńil bóledi", deıdi sarapshy. Onyń aıtýynsha, Qazaqstannyń strategııalyq mańyzy men basshylyq prınsıpterin joǵary baǵalaýǵa bolady.
Donald Tramp pen Nursultan Nazarbaev byltyr mamyr aıynda Saýd Arabııasynda kezdesti. Qazan aıynda telefon arqyly sóılesti. AQSh Keńes Odaǵy qulaǵan soń Qazaqstannyń táýelsizdigin alǵashqylardyń biri bolyp moıyndady.
Daıyndaǵan
Gúlnur Qýanyshbekqyzy,
"Egemen Qazaqstan"
