Saltanatty sharanyń ashylý rásimine qatysqan Memlekettik hatshy Gúlshara Ábdiqalyqova qazaqstandyq bilim berý reformasynyń basty maqsattarynyń biri – básekege qabiletti bilim keńistigin qurý ekenin atady.
«Prezıdent bıylǵy joldaýynda balalardy erte jastan damytý úshin mektepke deıingi bilim berý mekemelerine biryńǵaı standart engizilý tıis ekenin erekshe ataǵan bolatyn. Osy negizde bilim berýdiń negizgi satysy bolatyn arnaıy ortalyqtar úshin jaǵdaı jasalýy qajet», - degen G.Ábdiqalyqova balalardy, ata-analar men tárbıeshilerdi balabaqshanyń ashylýymen quttyqtap, onyń súıikti Astanamyzdyń 20 jyldyq mereıtoıy jylynda laıyqty tartý bolǵanyn erekshe atap ótti. Sonymen birge ol eldegi demografııalyq ahýaldyń da jyl saıyn jaqsaryp kele jatqanyna toqtaldy.
«Byltyr elimizde 409 myń bala dúnıe esigin ashqan. Qazir Astana jastardyń, balalardyń qalasy sanalady. Tek Astananyń ózinde 30 myń bala týǵan. Bul Qaraǵandy oblysynyń bir aýdanyndaǵy turǵyn sanymen shamalas degen sóz. Bul óte tamasha kórsetkish, osy qarqynmen Astananyń damýy órkendeı bermek», dedi memlekettik hatshy. Onyń sózinshe, 2017 jyly elde 849 balabaqsha ashyldy, onyń 82-si – Astanadaǵy mektepke deıingi mekemeler.
«Qazir elimizdegi 3 pen 6 jas aralyǵynda 90 paıyz balany qamtyp otyrmyz. 2020 jylǵa deıin eldegi balalardy túgel qamtý kerek týraly mindet qoıylǵan. Osy úshin jumys isteıtin bolamyz», dep málimdedi Gúlshara Ábdiqalyqova.
350 orynǵa arnalǵan mektepke deıingi bul mekeme – Prezıdenttik Is basqarmasy Medısınalyq ortalyǵynyń «Qarlyǵash» balabaqshasy» memlekettik kásipornyna qarasty úshinshi nysan. Memlekettik kásiporyn dırektory Gúlnár Abdýllına ortalyqtyń jumys isteý tártibi men balalardyń ıntellektýaldy damýyna arnalǵan oqý bólmelerin tanystyrdy.
Ortalyqta balalardyń fızıkalyq damýy úshin sanıtarııalyq-gıgıenalyq talaptarǵa saı materıaldyq-tehnıkalyq baza qurylǵan. Ár obektide balalardyń fızıkalyq jáne psıhologııalyq densaýlyǵyn nyǵaıtý men saqtaýǵa arnalǵan jaǵdaı jasalǵan. Júzý basseınderi, balalardyń fızıkalyq jáne shyǵarmashylyq qabilettilikteriniń damýyna arnalǵan sporttyq zaldar, konferens-zal, oqý kabınetteri, fıtobarlar, psıholog men logopedterdiń kabınetteri zamanaýı talaptarǵa saı jabdyqtalǵan.
«Balabaqshada ınnovasııalyq tehnologııalardy qoldaný jáne balalardyń tanymdyq-kommýnıkatıvtik daǵdylaryn damytý maqsatynda mýltımedıalyq baǵdarlamalyq-ádistemelik keshen – mýltıtildik zııatkerlik ortalyq (MZO, Izraıl) qoldanylady. Sondaı-aq kúndelikti oqý barysynda konstrýktıvtik elementterimen erekshelenetin V.V. Voskobovıchtiń damytýshy oıyndary oınatylady», deıdi kásiporyn dırektory Gúlnár Abdýllına.
Ortalyqty aralap júrip bir buryshqa tigilgen asyqtarǵa kózimiz tústi. Qyzyldy-jasyldy etip boıalǵan asyqtarmen doıby, alshy, han talapaı oınaýǵa laıyqtalyp arnaıy oryndar jasalypty. Ortalyq mamandarynyń aıtýynsha, asyq oıyny balanyń jastaıynan júıke júıelerin shyńdap, olardy dáldikke, ustamdylyqqa, baısaldylyqqa tárbıeleıdi eken. Odan bólek kez kelgen sabaqta unamdy sýretter, syzbalar, tásilder arqyly grafıkalyq ıllıýstrasııalar negizinde aqparattyq-kommýnıkasııalyq tehnologııalardy paıdalaný tárbıelenýshilerdiń tanymdyq belsendiligin arttyryp qana qoımaı, logıkalyq oılaý júıesin qalyptastyrýǵa, shyǵarmashylyqpen eńbek etýine jaǵdaı jasaıdy.
Aıa О́MIRTAI,
Sýretke túsirgen - Erlan OMAR
«Egemen Qazaqstan»
