Mańǵystaý oblysynyń ekonomıkalyq damýynyń basym baǵyttary: kólik jáne logıstıka, qurylys, týrızm, agroónerkásip kesheni, sondaı-aq teńiz baǵytynyń damýynda jetekshi ról atqaratyn munaı ken oryndarynyń qyzmet kórsetý salasy. О́ndiristi qurý jáne iske qosý úshin barlyq jaǵdaı jasalǵan jáne óńirde «Aqtaýteńizporty» AEA jumys isteıdi. Indýstrıaldy aımaq qurylǵan.
Taraptar Mańǵystaý oblysyndaǵy Aqtaý ekoqalashyǵynyń iri jobasyn ázirleý úshin qurylystyń bas merdigerin jáne qarjylandyrý qurylymyn taǵaıyndaıdy. Kelisimge sáıkes, ınvestısııa kólemi Ulybrıtanııa tarapynan 2,1 mlrd. AQSh dollary kólemindegi jobanyń 100% -yn, al qytaılyq tarap 400 mıllıon dollarǵa banktik kepildikti qamtamasyz etedi. Jobany júzege asyrý úshin Mańǵystaý oblysynyń ákimdigi oblys ortalyǵynyń soltústik bóliginen 865 gektar jer bóledi. Munda qoljetimdi baspana, kommersııalyq jáne saýda ortalyqtary, mektepter, balabaqshalar men medısınalyq ortalyqtar salynady.
Sonymen qatar, IT park, qonaq úı brendteri, sporttyq stadıondar, oıyn-saýyq mekemeleri jáne túrli memlekettik qyzmetter, zamanaýı energetıkalyq/ekologııalyq taza tehnologııalarmen tasymaldaý qyzmetteri kórsetiletin ekoqalashyq álemdik saıası arenada elimizdiń bedelin ósirgen «EKSPO-2017» halyqaralyq kórmesiniń jalǵasy bolmaq. Aqtaý qalasynyń ákimdigi ınfraqurylymdy, onyń ishinde joldardy, energııamen jabdyqtaýdy, kárizdi jáne sýmen qamtamasyz etýdi óz mindetine alady. Jańa joba úshin kelisim ulybrıtanııalyq «Global Project Capital Ltd» kompanııasynyń bas dırektory Kennet Fýlton jáne AAG Corporate Services Ltd (Ulybrıtanııa) kompanııasynyń bas dırektory Rıchard Balaes, China Road and Bridge Corporation (CRBC) (QHR jáne Gonkong) bas dırektory Jang Djýn, sondaı-aq Mańǵystaý oblysynyń ákimdigi arasynda jasaldy.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy
