1976 jyly Almaty oblysynda dúnıege kelgen Aıdyn Smaǵulov dzıýdodan Qazaqstan Respýblıkasynyń Eńbek sińirgen sport sheberi, eńbek sińirgen jattyqtyrýshysy, «Dańq» ordeniniń ıegeri. Dzıýdodan birneshe halyqaralyq týrnırlerdiń jeńimpazy.
Bapkerlik qyzmetin 2005 jyly Almaty oblysynyń aǵa jattyqtyrýshysy bolyp bastaǵan. 2008-2010 jyldar aralyǵynda Qazaqstan jastar quramasynyń aǵa jattyqtyrýshysy, 2010-2012 jyldary «Jastar» sport kesheninde dırektordyń birinshi orynbasary, 2012-2017 jyldar aralyǵynda Qazaqstan ulttyq qurama komandasynda jattyqtyrýshy qyzmetin atqarǵan. Sonymen qatar, Aıdyn Smaǵulov 2000 jyly Qyrǵyz Respýblıkasy sapynda Sıdneıde ótken jazǵy Olımpıada oıyndaryna qatysyp, qola júldege ıe bolǵan.
Dzıýdodan Qazaqstan quramasyn 2012-2017 jyldar aralyǵynda Ermek Imambekov jattyqtyrǵan. Esterińizge sala ketsek, Ermek Imambekov tusynda Qazaqstan erler quramasy jazǵy Olımpıada oıyndarynan bir kúmis, álem chempıonatynda bir altyn, eki kúmis, Azııa oıyndarynda bir altyn, bir kúmis, bir qola jáne komandalyq jarys boıynsha bir kúmis medalǵa qol jetkizgen bolatyn.
«Maqsatymyz – qazaqstandyq dzıýdoshylardyń Azııa oıyndarynda, Azııa jáne álem chempıonattary men Olımpıada oıyndarynda nátıjeli kúres kórsetip, úlken jetistikterge qol jetkizý. Osyndaı maqsatta bapkerler quramy ulttyq quramadaǵy dzıýdoshylardyń jattyǵýyn jiti qadaǵalap, dzıýdodan úzdik memleketter qatarynda turý úshin aıanbaı jumys isteımiz, deıdi Qazaqstan ulttyq qurama komandasynyń jańa bas jattyqtyrýshysy Aıdyn Smaǵulov.
