Bul Shattyq Batannyń shaǵyn sheberhanasynda órbigen oılardyń bir úzigi ǵana. Shattyq shyǵarmalarynyń negizgi ózegi tabıǵattyń san alýan minezderi, qarapaıym aýyl adamdarynyń tynys-tirshiligi, qaz-qalpyndaǵy ómirdiń óz sýretteri. Onyń kenebinde nemeresin arqalaǵan áje seniń ájeńdeı, tal-terekter men úıler kádimgi ózińniń týyp-ósken aýylyńdaı kórinetini shyǵarmanyń shynaıylyǵy men ómirdiń ózinen alynǵan esh qospasyz, boıamasyz boıaýlarynda bolar. Myń boıaýdyń sıqyry keıde janyńa shuǵyla quısa, birde kóńilińdi qulazytady. Bárimizge baıqala bermeıtin ár sáttiń ádemi kórinisin Qudaı Taǵala sýretshiniń qylqalamyna úıip-tógip qoıǵandaı áser qaldyrady. Mundaı sezimder júrekten shyqqan týyndynyń jany bolady degendi dáleldeıtindeı.
– Biz sýret ónerin ulttyq deńgeıde baǵalaýǵa umtylýymyz kerek. Alysqa barmaı-aq ózimizdiń sýretshilerimizdiń boıaýlarynan, olardyń kompozısııalarynan nár alyp, naǵyz ónerdi tanýǵa talpynaıyq. Biz olardy qanshalyqty kókke kótere alsaq, bizdiń mádenıetimiz de sonshalyqty bıik bolady. Bir kartınany saldyń da, uqsattyń. Ol jaı ǵana oryndaýshylyq. Biraq týyndyǵa jan bitirý úshin onda seniń shyǵarmashylyq sheshimiń, boıaýyń, túsiń bolýy shart. О́zińniń kóńil kúıińdi sol kartınaǵa bere alsań ǵana ol jandanyp, naǵyz óner týyndysyna aınalady. Kartınalarymda ulttyq boıaýlarǵa, qanymyzǵa tán qanyq tústerge basymdyq berem. Ár shyǵarmam janymnyń bir bólshegi sııaqty. Naǵyz ónerdi saýdaǵa salýǵa bolmaıdy. Ol sol dáýirdiń tynysyn bolashaqqa jetkizýshi. Sýretpen tynystaımyn, sýretpen ómir súrem. Eń negizgi maqsatym óner aldyndaǵy tazalyqty saqtaý. Kıeli ónerdiń qadirin ketirmeý, tunyǵyn laılamaý, – deıdi Qazaqstan Sýretshileri odaǵynyń múshesi Shattyq Batan.
Sheberhanadan shyǵarda Shattyq aıtqan taǵy bir sóz oıyma eriksiz orala berdi: «Álemge áıgili Mıkelandjelo shákirt qabyldaıtyn kezinde olarǵa kim bolýdy armandaısyń dep suraq qoıady eken. Birde osy suraqty aldyna kelgen bir shákirtke qoıǵanda balań jigit sizdeı bolǵym keledi depti. Sonda dańqty sýretshi senen sýretshi shyqpaıdy dep qaıtaryp jiberipti. Munyń sebebin suraǵanda, men kezinde Qudaı bolýdy armandadym, biraq bola almadym. Al sen men bolýdy armandasań senen eshteńe shyqpaıdy degen eken». Budan túıgenimiz, adamnyń asqar bıigi talantymen ǵana emes, armanynyń asqaqtyǵymen ólshenedi.
Asqaq armanyn janyna jalaý etip óner ólkesinde ózindik órnegin salǵan Shattyq shyǵarmalary janymyzǵa shýaq shashqandaı ásermen qaıttyq.
...Shattyq shyǵarmalary shashqan shýaq...
Arman OKTIаBR,
«Egemen Qazaqstan»
ALMATY
