Aımaq basshysy jumys sapary barysynda aýdandyq emhana janynan ashylǵan ońaltý ortalyǵy men 2017 jyly jóndeýden ótken balalar kitaphanasyn aralap kórdi. Onyń kitap qorynda 12 265 kitap bar, 1475 oqyrman tirkelgen. Maqat aýdanynda 1327 kásipkerlik sýbektisi bar, salada 1394 jumys oryny qurylǵan.
Oblys ákimi densaýlyq saqtaý men bilim berýge qatysty máseleler boıynsha kóshpeli májilis ótkizdi. Oblystyq densaýlyq saqtaý basqarmasynyń basshysy Mánshúk Aımýrzıevanyń aıtýynsha, óńirde ana men bala ólimi azaıǵan. Basqarma ana men bala óliminiń aldyn alýǵa baǵyttalǵan sharalar josparyn jasaǵan. 4 akýsher dáriger anestezıolog-revmotolog, 30 akýsher, 220 ýchaskelik qyzmet dárigeri oqytýdan ótti. Júkti áıelderdi skrınıng merziminde ýltra dybystyq tekserýden ótkizýdi baqylaý qatań nazarda jáne bolashaq analarmen túsindirý jumystary únemi ótedi.
- Bul baǵytta aralyq qortyndylarmen qanaǵattanbaı, kórsetkishti nólge jetkizýimiz kerek. Bosanǵan ana men balanyń ómiri júktiliktiń alǵashqy aıynan bastap dárigerlerdiń qaraýynda bolýy tıis. Mamandaryńyzben jumys júrgizińizder, analardyń jaǵdaıyn baqylaýda ustap, qajet sharalardy ýaqytynda qabyldaýlary kerek. Halyq bizden ýaqytyly jáne kásibı medısınalyq kómek kútedi, solaı jasaýǵa mindettimiz, - dedi Nurlan Noǵaev.
Aımaq basshysy óńirge jumys isteýge shaqyrylǵan mamandardy qyzmettik pátermen qamtý jaıyn da aıtty. Anyqtalǵandaı, barlyq aýrýhanalar sharýashylyqtaryn tolyǵymen ózderi júrgizetindikten onda isteıtin mamandar memlekettik turǵyn úı qorynan baspana alatyn azamattar tizimine enbeıdi eken.
- Shaqyrylǵan mamandarǵa qolaıly jaǵdaı jasaýymyz kerek. Qyzmettik jáne jalǵa beriletin turǵyn úı berýdiń mehanızmderi bar. Mamandarǵa úı alýdyń múmkindikteri men tártibin túsindirýge tıisspiz. Barlyq jaýapty adamdarǵa osy máseleni sheshýdi tapsyramyn, - dedi Nurlan Noǵaev.
Jınalysta aıtylǵandaı, 2017 jyly aımaqta 8 mektep paıdalanýǵa berildi, bıyl 9 mekteptiń qurylysy jalǵasady. 34 jalpy bilim berý mekemesiniń jobalaý smetalyq qujattamasy daıyndalýda.
2018 jyly jańa modıfıkasııa bólmelerin, ınteraktıvti taqta alýǵa, robottehnıka bólmelerin jabdyqtaýǵa 1,3 mlrd teńge bólý josparlanyp otyr. Oblys ákimi osy baǵyttaǵy jumysty kúsheıtýdi tapsyrdy.
Aımaq basshysy sondaı-aq «Nur Otan» partııasynyń aýdandyq fılıalynda azamattardy qabyldap, Maqat aýdanynyń ákimi Berikqalı Sársenǵalıevtiń jyldyq esep berý jıynyna qatysty.
