Tótenshe jaǵdaıdan qaza bolǵandardyń tizimi О́zbekstannyń Tótenshe jaǵdaılar mınıstrliginiń saıtynda jarııalandy.
Aldyn ala jasalǵan tizimde 29 adam bar. Qaza bolǵandardyń barlyǵy - er adamdar, Namanǵan oblysynyń týmalary. Qaza bolǵandardyń úlkeni 41 jasta, al kishisi 19 jasta. Osyǵan deıin IID ókilderi 52 jolaýshynyń avtobýs esigin asha almaı, otqa oranǵanyn habarlaǵan edi. Vedomstvo málimetinshe, avtobýstyń esigi buǵattalyp qalǵan. Sondyqtan jolaýshylar avtobýstan shyǵa almaı qalǵan. Sondaı-aq, avtobýstyń órtený deregi boıynsha qylmystyq is qozǵalǵany habarlanǵan edi. Aqtóbe oblysynyń TJD baspasóz qyzmetiniń málimetinshe, órtke qysqa tuıyqtalý sebep bolǵan.
"Bastapqy aldyn ala nusqa - qysqa tuıyqtalý. Qazir bul nusqa da ózgelermen qatar tekserilip jatyr", - dep habarlady Aqtóbe oblysynyń TJD baspasóz qyzmeti.
Aıta keteıik, osyǵan deıin Aqtóbede avtobýs órtenip, 52 adamnyń qaza tapqany jaıly habarlanǵan bolatyn. Ikarus markaly avtobýstyń 18 qańtarda saǵat 10:30-da Aqtóbe oblysy Yrǵyz aýdanynda Samara - Shymkent tasjolynyń 1068 shaqyrymynda Qalybaı aýylynan 10 shaqyrym jerde órtengeni aıtylǵan edi. Avtobýstyń ishinde 55 jolaýshy jáne eki júrgizýshi bolǵan. Onyń beseýi avtobýstan shyǵyp úlgergen.
