Qala mańynda 1000 oryndyq 4 mádenıet úıi, Dına Núrpeıisova atyndaǵy mýzykalyq kolledj stýdentterine arnalǵan 100 oryndyq jataqhana, Tasqala selosynda 320 oryndyq dene shynyqtyrý-saýyqtyrý kesheni boı kóteredi.
Erkinqala, Aqjar, Jańatalap, Tomarly selolarynda jańa mádenıet úıleri ashylady. Qaladaǵy 27 mekteptiń janynan sport alańdaryn, Erkinqala selosynda DSK, Balyqshy, Keńózek, Damby, Atyraý selolyq okrýgterinde alty sport zal, jasandy tósemi bar 4 fýtbol alańyn salý úshin jobalaý-smetalyq qujattama daıyndalýda.
Bıyl qala alańdaryn abattandyrý men demalys saıabaqtarynyń qurylysyn júrgizý josparlanyp otyr. Qazir «Isataı-Mahambet» ortalyq alańyn jańǵyrtýǵa, Jaıyqtyń oń jaǵalaýynan demalys ornyn salýǵa JSQ daıyndalyp, memlekettik saraptama júrip jatyr.
- Bul nysandar kezdeısoq tańdalǵan joq, qala ákiminiń azamattardy qabyldaýy men kezdesýlerinde halyqtan túsken usynystar jınalyp, júzege asyrylýda, - dep habarlady Atyraý qalasy ákiminiń baspasóz qyzmeti. - 2018 jyly azamattardan jaqsy ıdeıalar jınaýǵa baǵyttalǵan sharalar ótedi. Qala ákimi Serik Shapkenov mádenı kópshilik demalys oryndaryn salýǵa, turǵyndardan qoldaý tapqan jobalardy júzege asyrýǵa kóńil bólip otyr.
Aıta keteıik, bıyl Atyraý qalasynda 7 sýburqaqtyń qurylysy bastalady, jańa nysandardyń jobalaý-smetalyq qujattamasy memlekettik saraptamadan ótip jatyr.
