Foto: Temirbolat TOQMÁMBETOV
Nemis tehnologııasy boıynsha iri paneldi qabyrǵalardan salynǵan 9 qabatty, 180 páterlik jańa úıdi «Bolashaq-T» kompanııasy bar-joǵy 8 aı ishinde bitirip úlgergen. Al kirpishten qalanǵan 96 páterlik ekinshi úıdi «Domostroıtel» óndiristik kooperatıvi salǵan. Munyń alǵashqysyna 1,3 mlrd teńge qarajat ketse, ekinshi qurylys 830 mln teńgeden astam qarjyǵa baǵalanǵan.
- Elbasy N.Á. Nazarbaev jaqynda ǵana Qazaqstan halqyna arnalǵan «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýynda turǵyn úı-kommýnaldyq keshenge, halyqtyń turǵyn úı qurylysyna erekshe kóńil aýdarýdy taǵy da tapsyrdy. Mine, Elbasy qabyldaǵan «Nurly jer» baǵdarlamasy aıasynda búgin biz 300-ge jýyq páterdi jańa ıelerine tabystaǵaly turmyz. Bul – úlken qýanysh. Bul – memlekettiń qamqorlyǵy. Bul memlekettik baǵdarlamalardyń halyq ıgiligine jumys istep jatqanynyń kórinisi, Kópten kútken qýanyshtaryńyz qutty bolsyn! – dedi páter kiltin tabystaýǵa arnalǵan saltanatty sharada Batys Qazaqstan oblysynyń ákimi Altaı Kólginov.
Oralda aýa temperatýrasy mınýs 30 gradýsqa jýyqtap tur. Kúnniń aıazyna qaramastan jınalǵan halyqtyń qýanyshynda shek joq, shashý shashyp, toılap jatyr.
О́ńir basshysy Altaı Kólginov, Batys Qazaqstan oblystyq máslıhatynyń hatshysy Málik Imanqul, Oral qalasynyń ákimi Murat Muqaev jańa páter ıelerine baspana kiltterin saltanatpen tabys etti. Sý jańa shańyraq kiltin aldymen alǵan kóp balaly otbasylar atynan Sáýle Rahmetova, Aleksandr Mahorın, Qyrmyzy Meńdesheva memleket tarapynan kórsetilip jatqan qamqorlyq úshin Elbasyna, óńir basshylyǵyna jáne qurylysshylarǵa alǵys aıtty.
Qazbek QUTTYMURATULY,
«Egemen Qazaqstan»
