Fransııanyń Qazaqstandaǵy Elshisiniń aıtýynsha, 2006 jyldan beri Qazaqstan Eýropanyń joǵary bilim berý júıesine qatysyp keledi. Alaıda búginde stýdentterdiń tek 3 prosenti ǵana Eýropaǵa baryp oqıdy. Bul - tym az kórsetkish. Máselen, qazirgi kezde Fransııa ýnıversıtetterinde 310 myń shetel stýdentteri oqıdy. Sonyń ishinde 35 myń adam - Qytaı azamattary. Al qazaqstandyq stýdentterdiń sany 600-ge de jetpeıdi.
«Búgin men «Abai-Vern» baǵdarlamasynyń bastalatynyn resmı túrde jarııalaımyn. Atalǵan baǵdarlama aıasynda Fransııa úkimeti Halyqaralyq baǵdarlamalar ortalyǵymen («Bolashaq» - avt.) birlesip, stýdentterdiń oqýyn qarjylandyrady. 2018 jyldan bastap 100 stıpendııa qarastyrylǵan. Sonyń ishinde 90 stıpendııa magıstratýranyń 2-kýrsynda oqıtyndar arasynda taratylady. Qalǵan 10 stıpendııa doktoranttarǵa beriledi», - dedi F.Martıne búgin «International Education Fair 2018» Halyqaralyq bilim kórmesi aıasynda.
Osydan keıin elshi myrza Abaı Qunanbaevtyń murasy jaıynda qazaq tilinde aıtyp berdi.
«Uly Abaı - qazaq xalqynyń maqtanyshy, Lermontov, Gete men Pýshkındi qazaqsha sóıletken aǵartýshy, qazaq eliniń danyshpany. Ol - Jıýl Verndi qazaq oqyrmanyna tanystyrǵan jazýshy, dúnıejúzinde eń kóp aýdarylǵan avtorlardyń biri», - dep atap kórsetti F.Martıne.
