«Kún saıyn, tańǵy saǵat 06.00-de birinshi aýysym úshin (ekinshi aýysym úshin saǵat 12.00-de) jaýapty qyzmetker «Qazgıdromet» RMK-niń kezekshisimen baılanysqa shyǵyp, Astanadaǵy aldaǵy úsh saǵatqa arnalǵan naqty aýa temperatýrasy týraly málimetterdi alady. Alynǵan málimetter basshylyqqa jetkiziledi. Basshylyq óz kezeginde sabaqtardyń ótkizilmeýin habarlaý nemese oqý prosesin esh ózgerissiz uıymdastyrý jóninde sheshim shyǵarady. Sabaqtardyń ótkizilmeıtindigi týraly sheshim shyǵarylǵan jaǵdaıda, jaýapty qyzmet bul aqparatty Astana qalalyq TJD-nyń jedel kezekshisine, qalalyq monıtorıng jáne jedel áreket etý ortalyǵynyń (109 qyzmeti) operatoryna, Astana qalasy ákiminiń qabyldaý bólmesine jiberedi», - delingen Bilim basqarmasy Feısbýkte jarııalaǵan ınfografıkada.
Budan keıin, saǵat 06.15-ten bastap (ekinshi aýysym úshin saǵat 12.15-ten bastap) aqparat Astana qalasy ákimdiginiń resmı ınternet-resýrsynda, Astana qalalyq Bilim basqarmasynyń Feısbýk áleýmettik jelisindegi paraqshasynda jarııalanady. Sonymen qatar, qala turǵyndary men qonaqtaryn habardar etý maqsatynda aqparat mektep basshylyǵyna, messendjerler arqyly buqaralyq aqparat quraldaryna beriledi.
«Sabaq ótkizilmeıtin kúni oqýshylar mektepke kelgen jaǵdaıda bilim ordasynyń basshylyǵy sabaqtyń kestege sáıkes ótýin qamtamasyz etedi (alaıda, baqylaý jumystary ótkizilmeıdi, pánder boıynsha jańa taqyryptar túsindirilmeıdi). Sabaqtar aıaqtalǵan soń synyp jetekshileri oqýshylardyń úılerine ata-anasymen (zańdy ókilderimen) birge qaıtqanyna kóz jetkizýi kerek. Ata-analarǵa meteomálimetterge, ınternet-qosymshalar men resmı emes ózge derekkózderden alynǵan aqparattarǵa nazar aýdarmaýǵa keńes beriledi», - delingen ınfografıkada.
Sabaqtardyń ótkizilmeıtindigi týraly resmı aqparatty kelesi derekkózderden bilýge bolady:
1. «109» nómiri (uıaly telefondardan qońyraý shalý tegin);
2. Astana qalalyq Bilim basqarmasynyń ınternet-resýrsy (bilim.astana.kz);
3. Astana qalalyq Bilim basqarmasynyń Feısbýktegi paraqshasy (Facebook.com/bilimastana);
4. Smart Astana qosymshasy.
