Dúbirli dodaǵa kelgen balǵyn sportshylardy Shyǵys Qazaqstan oblysy dene shynyqtyrý jáne sport basqarmasynyń basshysy Asqar Mojanov quttyqtady. «Sizderdi búgingi halyqaralyq týrnırdiń ótýimen oblys basshylyǵy jəne basqarma atynan shyn júrekten quttyqtaımyn. Osyndaı keremet jeńil atletıka manejinde halyqaralyq deńgeıdegi jarystyń ótkizilýi qýanyshty jaıt. Jarysqa jınalǵan ár jeńil atlet óz eliniń namysyn abyroımen qorǵaıtyny belgili. Endeshe, mundaǵy qatysýshylardyń barlyǵy tek joǵary nátıje kórsetip, aldaǵy ýaqyttarda sizderden dúbirli dodalarda júlde alatyn sportshy shyǵady degen úmittemin», – dedi basqarma basshysy.
Atalǵan basqarmanyń baspasóz qyzmetiniń habarlaýynsha, halyqaralyq týrnırge sany 140-qa jýyq sportshy qatysty. О́tken jyly 7 elden sportshylar kelse, bıylǵy jeńil atletter jarysynda qazaqstandyq sportshylardan bólek, 8 memlekettiń (Qyrǵyzstan, О́zbekstan, Tájikstan, Armenııa, Ázirbaıjan, Grýzııa, Malaızııa jáne Ýkraına) jeńil atletteri júldeli oryndardy sarapqa saldy. Týrnır barysynda sportshylar bıiktikke sekirý, úsh qarǵyp sekirý, uzyndyqqa sekirý, ıadro laqtyrý, 60 m júgirý, 60 m barermen júgirý, 400 m júgirý, 800 m júgirý, 3000 m júgirý, 4*200 m, 4*100 m, 4*400 m jáne aralas estafeta syndy jeńil atletıkanyń baǵyttary boıynsha kúsh synasty.
Sportshylardy marapattaý barysynda áıgili jeńil atletshi Olga Rypakova jarysqa jınalǵan barlyq qatysýshylarǵa jáne halyqaralyq týrnırdiń ótýine atsalysqan Shyǵys Qazaqstan oblysy ákimdigi men Qazaqstan Respýblıkasy jeńil atletıka federasııasyna alǵysyn bildirdi.
Azamat QASYM,
«Egemen Qazaqstan»
