Elbasynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýyn qoldaýǵa arnalǵan aktıv jınalysynda oblys ákimi Janseıit Túımebaev aldaǵy basty maqsat – jańa tehnologııalyq qalyptyń barlyq artyqshylyqtaryn paıdalana otyryp jańa ekonomıkalyq úlgige ótý ekenin atap ótti. Qazaqstannyń údemeli ındýstrııaldy-ınnovasııalyq damýynyń ekinshi kezeńiniń aıasynda oblysta jalpy quny 1 trıllıon 300 mıllıard teńgeni quraıtyn 137 joba iske asyrylýda. Bul jobalar osy besjyldyqta 18 myń jańa jumys ornyn ashýǵa múmkindik beredi. О́tken jyly Saıram jáne Qazyǵurt aýdandarynda gıdroelektr stansalary iske qosyldy. Al, Shymkent qalasynda kárizdiń qaldyq sýynan bıogaz, odan elektr qýatyn óndiretin kásiporyn ashyldy. Oblystyń birneshe aýdandarynda kún elektr stansalary salynyp jatyr. «Prezıdent Joldaýynda kásiporyndardyń energııa tıimdiligi men energııa únemdeýge, sondaı-aq energııa óndirýshilerdiń óz jumystarynyń ekologııalyq tazalyǵy men tıimdiligine qoıylatyn talaptardy arttyrý kerektigi aıtyldy. Joldaýda júktelgen tapsyrmalardy basshylyqqa ala otyryp, biz osy baǵyttaǵy jumystardy jandandyra túsemiz. Sebebi, Ońtútik Qazaqstan oblysy – kúnshýaqty ólke. Bizde bir jyldaǵy 365 kúnniń 300-inde aspan ashyq bolyp, kún nuryn tógip turady. Biz bul áleýetti barynsha tıimdi paıdalanyp, energetıka salasyn damytýǵa tıispiz», – dedi oblys ákimi.
Sondaı-aq, oblys basshysy Prezıdent Joldaýda aýyl sharýashylyǵy ónimderiniń eksportyn aldaǵy 5 jylda 2,5 esege arttyrýdy tapsyrǵanyn aıta kele: «oblysta tabıǵı qazba baılyqtardyń aıtarlyqtaı mol qory joq. Bizdiń súıenerimiz, negizinen osy agrarlyq sala. Sondyqtan aýyl sharýashylyǵy ónimderiniń eksportyn kem degende 3 esege arttyrýǵa tıispiz», – dedi. Basqosýda ár salaǵa jaýapty basshylar, sarapshylar men mamandarǵa Joldaýdan týyndaıtyn mindetterdi júzege asyrýdyń naqty josparyn qurý tapsyryldy.
Ǵalymjan ELShIBAI,
«Egemen Qazaqstan»
