Bir jylda qurylysy da aıaqtaldy. Bir-eki ret ushý baǵytyn synap kórgen ushaq qondy. Sodan beri Baıanaýylǵa ushaqpen ushqan jolaýshylar jaıly estilmeıdi. Biraq, aýdan ákimdigi qazir bir emes, birinen soń biri 20 ushaq qondyra alamyz dep otyr. Sóıtip, týrısterdiń kelip-ketýine jaǵdaı jasaıdy. Charterlik reıster qabyldaýdy da josparlaýda. Qarajat bólindi, ushaq bar, aerodrom daıyn, jolaýshy suranysy artsa boldy. Oblys ákimdiginiń málimetinshe, Astana-Baıanaýyl, Qaraǵandy-Baıanaýyl, Pavlodar-Baıanaýyl baǵyttarynan shaǵyn ushaqtardy qabyldamaq. Bastapqy eki baǵyt respýblıkalyq bıýdjetten, ishki reıster oblys bıýdjetinen sýbsıdııalanbaq. Áýe reısterin jasaýǵa 2 avıakompanııa daıyn kórinedi.
Ushty, ushty ushaq ushady! Taǵy da aerodromǵa arnalǵan jobalyq-smetalyq qujat, joba-jospar jasalypty. Áýege arnalǵan jobalardyń oryndalýy úshin shamamen taǵy da 250 mıllıon teńge kerek kórinedi. Negizi bundaı qyrýar qarajat jerge de kerek: Baıanaýylǵa baratyn respýblıkalyq jol áli jóndelmeı tur. Jyldaǵy kóktemgi sý tasqynyna daıyndyq jumystary da kútip tur. Jol boıyndaǵy Maıqaıyń kenti mańaıynan sý qoımasy salynsa, tasqyn sýdyń arnasy burylyp, aýyldar úrıelenbes edi.
Farıda BYQAI,
«Egemen Qazaqstan»
