Elektrondy qyzmet – halyqqa eń qolaıly tásil

Jýrnalısterge memlekettik qyzmet kórsetýdi elektrondy formatqa kóshirý jóninde to­lyqqandy málimet bergen Aq­­parat jáne kommýnıkasııa­lar vıse-mınıstri Qaırat Ba­lyq­baev elektrondy úkimet por­talynyń damýy men «Aza­mat­tarǵa arnalǵan úkimet» mem­lekettik korporasııasynyń qyz­metin jetildirýge erekshe mańyz berilip otyrǵanyn jetkizdi. «Bul – memlekettik qyzmetterdi halyqqa qolaıly, qoljetimdi etýdiń eń yńǵaıly joly. Qazirgi tańda 746 memlekettik qyzmettiń 621 túri, ıaǵnı 83 paıyzdan astamy «Azamattarǵa arnalǵan úkimet» júıesine ótkizilgen. Elektrondy úkimet ınfraqurylymy arqyly búginde 452 memlekettik qyzmet kórsetiledi», dedi vıse-mınıstr.

Mınıstrlik memlekettik qyzmetterdi ońtaılandyrý, olar­dy elektrondy formatqa kóshi­rý jumystaryn áli de damy­ta túspek. Osyǵan baıla­nysty byltyrdyń ózinde jurt­shylyqqa yńǵaıly birqatar jobalar iske asqan eken. Mysaly, ótken jyly bala týýǵa baılanysty kórsetiletin mem­lekettik qyzmetter proaktıvti tásil ar­qy­ly ońtaılandyrylǵan. Bul jo­baǵa sáıkes jańa bosanǵan áıel burynǵydaı halyqqa qyz­met kórsetý ortalyqtaryna kelip jatpaı-aq, telefon arqy­ly sábıin tirketip, týý týra­ly kýálikti jasatyp, balabaq­shaǵa kezekke qoıyp, tipti náres­teniń ómirge kelýine baıla­nys­ty beriletin tıisti járdem­aqy­ny resimdegen. Vıse-mınıs­tr­diń aıtýynsha, bul jerde ha­lyq memlekettik qyzmetke jú­gin­beıdi, memlekettik organdar tıe­sili qyzmetti usynyp, halyqqa ózderi shyǵady. Aıtalyq, búgingi tańda tıisti mamandar jańa bo­sanǵan 11 590 áıelge ózderine tıesili qyzmetti alý jóninde SMS-habarlama joldaǵan eken. Olardyń 4 myńǵa jýyǵy habar­lama boıynsha proaktıvti tásilge júgingen. Osylaısha, 715 týý týraly kýálik berilip, 261 náreste balabaqshaǵa kezekke qoıylǵan. 

Buǵan qosa, qazir mınıstrlik memlekettik qyzmetterdi elektrondy sıfrly qoltańbasyz kór­setý jónindegi sharalardy qol­ǵa alǵan. Qazirdiń ózinde ESQ-syz 30 elektrondy qyzmet túrin alýǵa bolady.

Brıfıngke qatysqan «Aza­mattarǵa arnalǵan úkimet» memlekettik korporasııasynyń bas­qarma tóraǵasy Abylaıhan Os­panov elimizde jyl saıyn 37 mln-nan astam memlekettik qyz­met kórsetilse, olardyń 24 mln-ǵa jýyǵy elektrondy formatta ekenin atap ótti. Qazirgi tań­da kez kelgen memlekettik qyz­metti ýaqtyly kórsetý qatań baqylaýǵa alynǵan. Osy ju­mys­tardy rettep otyratyn arnaıy Ahýaldyq ortalyq ashyl­ǵan. Son­daı-aq aqparattyq ashyq­tyq­ty qamtamasyz etý maq­sa­tynda memlekettik korpora­sııa veb-saıt forýmy iske qo­sy­lyp, halyqpen keri baılanys or­natý, qyzmet kórsetý sa­pa­syn jaqsartý maqsatynda usy­nys­tardy qabyldaı bastaǵan. A.Os­panovtyń aıtýynsha, forýmda talqylanǵan máseleler, kez kelgen azamat tarapynan jasalǵan eskertýler nazardan tys qalmaı, munyń bári salany jetildirý barysynda eskeriletin bolady. 

Jıynda «Ulttyq aqparat­tyq tehnologııalar» AQ bas­qar­ma tóraǵasynyń orynbasary Botagóz Qasabek Joldaýda atalǵan «bir ótinish» qaǵıdasy bo­ıynsha ke­shendi qyzmet kór­setýge kó­shýge múmkindik beretin aqparattyq júıelerdi ıntegrasııalaý týraly aıtyp berdi. Onyń aıtýynsha, búginde elektrondy úkimet portaly 237 qyzmet kórsetý men servısti, eLicense.kz elektrondy lısenzııalaý porta­ly 440 avtomattandyrylǵan qyz­met alýdy usynyp otyr. Olar­dyń ishinde bıznesti tirkeý jáne damytý, lısenzııalaý, salyq­tar, bank isi, sýbsıdııalaý syndy onlaın-qyzmetter bar.

Qyzmetterdi elektrondy format­qa kóshirýge baılanysty halyq­tyń ýaqyty únemdelip, qaǵaz­bas­tylyq azaı­ǵanyn atap ót­ken B.Qasabek ońtaı­landy­rý­dyń arqasynda bıznesti onlaın tirkeý de jeńildegenin aıta­dy. Ol keltirgen málimetke súıen­sek, egov arqyly 2012 jyldan bas­tap 177 824-ten astam kompanııa ashylsa, byltyr 48 367-den astam zańdy tulǵa tirkelgen.

Qymbat TOQTAMURAT,
«Egemen Qazaqstan»