Aıgúl Shaımova faktorly-baldyq shkala negizindegi memlekettik qyzmetkerlerdiń laýazymdyq qyzmetaqylaryn qurý jáne bonýstar júıesi, buryn tájirıbede qoldanylǵan júıeden jańa júıeniń negizgi aıyrmashylyqtary, memlekettik qyzmetkerler eńbeginiń nátıjeleri qalaı jáne qandaı ólshemder boıynsha baǵalanatyny týraly habarlady.
Memlekettik qyzmet isteri jáne sybaılas jemqorlyqqa qarsy is-qımyl agenttiginiń ókili Ǵanıjan Asanuly jańadan engizilip jatqan eńbekaqy tóleý júıesi týraly keńinen baıandady.
«Jańadan engizilip jatqan eńbekaqy tóleý júıesi negizgi eki bólikten turady. Birinshisi, turaqty túrde alyp otyratyn jalaqy, sonymen qatar jyl sońynda onyń nátıjesine baılanysty alatyn bonýstar. Bonýsqa keletin bolsaq, bul nege jyldyń sońynda? Árbir memlekettik organnyń aldynda jyl basynda strategııalyq mindetter, maqsattar qoıylady. Eger memlekettik organ jyl sońyna qaraı qandaı da bir strategııalyq mindetke jete almasa nemese onyń qyzmeti kerisinshe tıimdi bolyp tabylmasa, onda tek memlekettik organnyń basshysy ǵana emes, sonymen qatar qyzmetkerlerge de jaýapkershilik túsedi. Sebebi kúndelikti ómirde memlekettik organ aldynda turǵan mindetterge qyzmetshilerdiń de tikeleı áseri bar. Tıisinshe árbir qyzmetshi jyl sońynda belgili bir bonýsqa qol jetkizgisi kelse, ol óziniń qyzmet tıimdiligin, sonymen qatar jumysqa degen jaýapkershiligin arttyrady. Jáne de bonýstyń engizilýi eń aldymen, básekelestik týdyrady. Básekelestik bar jerde sapanyń artatyny aıqyn», dedi ol.
