Osy atalǵan medaldi el múddesi jolynda eńbek etip kele jatqan óńirimizge tanymal bir top zııaly qaýymǵa Semeı aımaqtyq «Aqjol» partııasynyń tóraǵasy Rahat Altaı arnaıy tabystady. Alashorda úkimetiniń negizin qalaǵan arystarymyzdyń Táýelsizdik jolynda jankeshti eńbekterin jan-jaqty nasıhattap kele jatqan jerlesterimiz de az emes. Estelik medalmen Abaı qoryq-mýzeıiniń dırektory Bolat Júnisbekov, abaıtanýshy-fılosof Asan Omarov, alashtanýshy Tursyn Shańbaı, E.Jetibaev, A.Muhamedchınov, S. Sypataı syndy azamattar marapattaldy.
Sonymen qatar, Shyǵys Qazaqstan oblysy «Aqjol» partııasy fılıaly tóraǵasynyń orynbasary Búrkit Sultanov Alash qozǵalysynyń 100 jyldyǵyn atap ótý sharasyna uıymdastyrý jumystaryna belsene atsalysqandarǵa QR Mádenıet jáne sport mınıstri Arystanbek Muhamedıulynyń jáne «Aqjol» Qazaqstan demokratııalyq partııasynyń tóraǵasy Azat Perýashevtyń alǵys hatyn qalamyzǵa belgili alashtanýshy ǵalymdarǵa, Alash qozǵalysynyń 100 jyldyǵy qarsańynda qoldaý kórsetken tulǵalarǵa tabystady. Shara barysynda Muqan Tólebaev atyndaǵy mýzykalyq koledjiniń ustazy, ánshi-sazger Samat Sypataı Serik Qusanbaevtyń sózine jazylǵan «Arystar qaıda?» ánin oryndap, kópshilikti erekshe áserge bóledi.
Sondaı-aq, Abaı shańyraǵynyń aqyndary Qaırat Sabyrbaı, B.Ahmer Táýelsizdikke arnalǵan óleńderin oqydy. Sharaǵa qatysýshy qonaqtar «M.Áýezov – Alash arystary» mýzeıiniń ekspozısııasyn jáne Abaı mýzeıinde ornalasqan Sh.Qudaıberdiulynyń 160 jyldyǵyna arnalǵan «Árqashan umytylmasqa...» kórmesin tamashalady. Shara sońynda jıylǵan qaýym Alash kósemi Áleıhan Bókeıhanulynyń eskertkishine gúl shoqtaryn qoıyp, baba rýhyna taǵzym jasady.
Raýshan Nuǵmanbekova,
Sýretterdi túsirgen avtor
Semeı
