Jıynǵa Májilis depýtattary, mınıstrlik ókilderi, joǵary oqý oryndarynyń rektorlary men óńirlik kásipodaq birlestikteriniń basshylary qatysty. Forýmdy Qazaqstan Respýblıkasynyń Kásipodaqtar federasııasy uıymdastyrdy.
Forýmda kásipodaqtar federasııasynyń tóraǵasy Baqytjan Ábdiraıym Joldaýdyń negizgi erejeleri men tezısteri kásipodaqtardyń qyzmetimen tikeleı baılanysty ekendigin atap ótti. «Kásipodaqtardyń qyzmetin túbegeıli reformalaý maqsatynda ortasha merzimdi kezeńge federasııany jańǵyrtýdyń jol kartasy ázirlendi. Bul óz kezeginde Qazaqstandaǵy kásipodaqtar qozǵalysyna jańa lep berýi tıis», dedi B.Ábdiraıym.
Salalyq bilim jáne ǵylym qyzmetkerleri kásipodaǵynyń tóraǵasy Maıra Amantaeva bıylǵy Joldaýda ustazdardyń quqyǵyn qorǵaý qajettigin túsiný, olardyń bilim alý deńgeıin arttyrý, ustazdar men ǵalymdardyń áleýmettik-ekonomıkalyq áleýetine járdemdesý máseleleri kóterilgenin sóz etti.
«Prezıdenttiń Qazaqstan halqyna arnaǵan Joldaýynda 10 mindet aıtyldy. Sonyń 7-shi mindeti bilim salasynyń qyzmetkerlerine arnaldy. Jalpy, osy 10 mindettiń júzege asýynyń ózi bilim salasyna, ıaǵnı kadrlardyń bilikti bolýyna, qazirgi zaman talabyna tótep bere alatyn maman daıyndaýǵa jáne solardyń eńbegine baılanysty. Bıylǵy Joldaý bilim salasy qyzmetkerlerine úlken mindet júktep otyr», dedi M.Amantaeva.
Forým barysynda kóterilgen máselelerdiń birqatary Kásipodaqtar federasııasy ázirlegen jol kartasyna engizildi. Osy qujatta áleýmettik ádildik jáne áriptestik qaǵıdalaryn damytý, áleýmettik-eńbek qatynastaryn arttyrý, kásipodaqtardy kúsheıtý jáne nyǵaıtý úshin naqty mindetter aıqyndalǵan. Jol kartasy elimizdegi quqyqtyq jappaı oqýdyń biryńǵaı júıesin qurýdy, Respýblıkalyq úshjaqty komıssııa jumysyn jańǵyrtýdy, bekitilgen ujymdyq sharttardyń sapasy men mólsherin arttyrýdy qarastyrady.
Qazaqstannyń kásipodaqtary jumys berýshilermen tyǵyz qarym-qatynas ornatý arqyly jumys oryndarynyń saqtalýyn qamtamasyz etip otyr. Qazirgi tańda jumys oryndaryn saqtaý jóninde 115 134 memorandým bekitilgen. Bul elimiz boıynsha 2,8 mıllıon eńbekkerdi qamtıdy.
Forým aıasynda oblystardaǵy bilim jáne ǵylym qyzmetkerleri kásipodaqtarynyń tóraǵalary sóz sóıledi. Kezdesýge qatysýshylar Nursultan Nazarbaevtyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýynda aıtylǵan mindetterdiń mańyzdylyǵyn sóz etti.
Abaı ASANKELDIULY,
«Egemen Qazaqstan»
