Shıeli kentindegi 150 oryndyq ortalyq aýrýhananyń irgetasy qalandy. Oblys ákimi aýdan turǵyndaryn jańa nysan qurylysynyń bastalýymen quttyqtap, jyly lebizin bildirdi.
«Elbasymyz Nursultan Ábishuly Nazarbaev jyl saıynǵy Joldaýlarynda ult densaýlyǵyn jaqsartý jaıyn udaıy aıtyp keledi.Osy rette, memleket tarapynan turaqty qoldaýdyń nátıjesinde elimizdiń densaýlyq saqtaý salasy júıeli túrde damý ústinde. Sońǵy eki jyldyń ishinde Syr óńirinde zamanaýı qural-jabdyqtarmen qamtylǵan 41 densaýlyq saqtaý nysany salyndy. Shıeli aýdanynda birazdan beri sheshilmeı jatqan jańa aýrýhana salý máselesi bolatyn. Búgin, mine, biz onyń qurylysyn bastadyq. Amanshylyq bolsa, aýrýhana kelesi jyly paıdalanýǵa beriledi»,- dedi oblys ákimi.
Sondaı-aq, aýyl turǵyndaryn eńbek ardageri Kıikbaı Smaıyluly quttyqtap, aq batasyn berdi.
Aımaq basshysy men QR Parlamenti Senatynyń depýtaty Murat Baqtııaruly Shıeli aýdanynda memlekettik-jekemenshik áriptestik aıasynda salynǵan 200 oryndyq sporttyq saýyqtyrý kesheniniń ashylý saltanatyna qatysty. Jalpy quny 42 mln. teńgeni quraıtyn sport kesheninde kúres, boks, kishi fýtbol, voleıbol sııaqty sport túrlerine arnalǵan zaldar bar. Keshen qurylysyn «BETA ı K» JShS júrgizgen.
Odan bólek, aımaq basshysy aýdan ákimderiniń halyq aldyndaǵy qorytyndy esep berý jıyndaryna qatysty.
«Aýdandardyń áleýmettik-ekonomıkalyq damý kórsetkishteri jaqsy, degenmen, osymen shektelýge bolmaıdy. Birneshe jyldar buryn Qyzylorda oblysy áleýmettik-ekonomıkalyq damý qarqyny boıynsha sońǵy orynda edi, al qazir aımaǵymyz kóptegen kórsetkishter boıynsha aldynǵy qatarda. Biz jańa dáýirde ómir súrýdemiz, sondyqtan onyń erejelerine baǵynýymyz qajet. Elbasynyń bıylǵy Joldaýyndaǵy basty mindet – barlyq salalardy sıfrlandyrý, sondyqtan nátıjege qol jetkizý úshin biz zaman talabyna saı bolýymyz kerek. Ol úshin barlyq múmkindikter bar. Joldaýdy júzege asyrý barysy árqaısymyzdyń jumysymyzǵa baılanysty», - dedi ol.
Sondaı-aq, aımaq basshysy 2018 jyl Qyzylorda oblysynda jappaı kásipkerlikti damytý jyly dep jarııalanatynyn málimdep, shaǵyn jáne orta bıznesti damytý máselesine de erekshe kóńil bólýdi tapsyrdy.
Aıta keteıik, sońǵy 5 jylda Qyzylorda oblysynda 57 medısınalyq nysan, onyń ishinde Aral, Qazaly jáne Shıeli aýdandaryndaǵy ortalyq aýrýhanalar ashyldy. 2018 jylynyń qańtar aıynan bastap Baıqońyr qalasynda 15 myń qazaqstandyqqa qyzmet kórsetetin emhana jumysyn bastady.
Sonymen qatar, aldaǵy 3 jylda taǵy da 100 densaýlyq saqtaý nysany salynbaq. Odan bólek, 2015 jyly olardyń jabdyqtalý kórsetkishi 43 paıyz bolsa, 2017 jyly 76,5 paıyzdy qurady, al aǵymdaǵy jyly 90 paıyzǵa jetedi dep josparlanýda.
Sońǵy 3 jylda oblysta 9 sporttyq nysan paıdalanýǵa berildi. Al, ótken jyly Qyzylordada memlekettik-jekemenshik áriptestik aıasynda boı kótergen sporttyq-saýyqtyrý kesheni óz jumysyn bastaǵan bolatyn. Sondaı-aq, aımaqtyń 7 eldi mekeninde de sport keshenderiniń qurylysy júrip jatyr.
