«Astana» Jolshıevtiń osyǵan deıin komandaǵa sińirgen eńbegin elep, eskerip, taǵy bir múmkindik bergen sııaqty. Klýbtyń basshysy Saıan Hamıtjanov muny ashyq aıtyp otyr. Rasynda, eńbegi orasan zor. Daýsyz. Komandanyń tarıhynda tuńǵysh ret chempıondar lıgasynyń toptyq kezeńinde oınaýǵa tap osy Jolshıevtiń nátıjeli oıyndary kómektesken. «APOEL»-ge baspen soqqan golyn qalaı umytasyń? Ol kezde Baýyrjan elordalyq komandanyń serkesi bolatyn. Ol kezde Baýyrjan myńdaǵan jankúıerlerdiń erkesi bolatyn. Ol kezde Jolshıev qazaq fýtbolynyń juldyzy bolatyn.
2015 jyly «Astana» kezekti chempıondyǵyn toılady. Komandany chempıondyqqa súıregen surmergenderiniń biri Baýyrjan Jolshıevtiń «juldyzdy» aýrýy asqynyp ketti. Aılyǵym az dedi. Eýropada oınaǵysy keldi. Anaý dedi. Mynaý dedi. Qysqasy, klýbta qalýǵa qulyq tanytpady. Aqyry «Astana» men Jolshıevtiń joldary ekige aıyryldy.
Juldyzdy oıynshysynan aıyrylǵan «Astana» abdyrap qalǵan joq. Onyń ornyn odan da myqty oıynshylar basty. Jankúıerler onyń jasyl alańda joqtyǵyn baıqamaı da qaldy. Baýyrjansyz da chempıon boldy. Eýropa alańdaryndaǵy jeńisti jolyn onsyz da kúni búginge deıin jalǵastyryp keledi.
Al endi, eki jyl joǵary deńgeıde fýtbol oınamaǵan adamnyń el chempıondary sapynda basqalarmen teń dárejede oınap kete alady degenge siz sene alasyz ba? Máselen, Tvýmasımen? Maevskıımen? Mujyqovpen?
Bir kezderi jasyndaı jarqyldaǵan oıynshyny «Astana-Arenadan» qaıta kórgimiz keletini belgili. Məsele, «Astananyń» quramyna ilige ala ma degen suraqta emes. Məsele, burynǵy babyna qaıta kele ala ma degen suraqta. Básekege qabilettigin dáleldese – myqtylyǵy. Shyn talantqa tusaý joq. Kúsh-qýaty jetedi. Fýtbolǵa degen nemquraıdylyǵy nege alyp kelgenin túsingen bolar. Áıtpese bolashaǵy bar fýtbolshy. Jaqsylyq kórse de, jamandyq kórse de ózinen. О́tkennen sabaq alyp, keleshegi úshin eńbektensin. Qaıta babyna kelip fýtbol jankúıerlerin qýanta berýine, tilektespiz!
Erkebulan JOMART,
«Egemen Qazaqstan»
