Atalǵan jýrnaldyń túrli-tústi boıaýmen bezendirilgen negizgi betteri kemeńger tulǵanyń ǵumyrbaıanynan erekshe oryn alatyn kıeli jerlerdiń fotosýretterimen, aqynnyń aqtalýyna baılanysty tabylǵan derek pen dáıekke toly qujattarmen jaqynyraq tanysýǵa múmkindik beredi. 120 betten turatyn basylymdaǵy ǵylymı maqalalar men zerdeli zertteýler Shákárim óleńderiniń bir-bir tarmaǵy boıynsha taqyrypsha bolyp, arnaýly 10 taraýǵa bólinip berilýi izdenýshi oqyrman úshin úlken paıdasyn tıgizip, yńǵaıyna qaraı jeńil oqylady.
Alǵashqy «Adamdyq boryshyń – halqyńa eńbek qyl» taraýyndaǵy Abaı qoryq-mýzeıiniń dırektory Bolat Júnisbekovtiń «Keleshekpen tildesken kemeńger» atty maqalasy tutastaı Shákárim Qudaıberdiulyna arnalyp jaryqqa shyǵyp otyrǵan jýrnal sanynyń alǵysózi ispetti basylyp, avtordyń aqyn óleńderine, jalpy shyǵarmashylyǵy týraly ıdeıasy oqyrmanǵa oı salady.
Osy aıdardaǵy «Qazaq» gazetiniń 1915 jylǵy 22 sáýirdegi №121 sanynda jarııalanǵan Alash arysy Álıhan Bókeıhannyń «Qalqaman-Mamyr» atty maqalasyn sol dáýirdegi Shákárimniń «Qalqaman-Mamyr» poemasymen qatar jalpy aqyn shyǵarmashylyǵyna berilgen eń alǵashqy laıyqty baǵa, soǵan qosa zııaly qaýym ókilderiniń parasatty pikiri esebinde qabyldaýǵa bolady. Osy aıdardaǵy belgili ádebıettanýshy ǵalym, professorlar Arap Espenbetovtiń «Ulylyqty tanýǵa umtylys» jáne Baltabaı Ábdiǵazıulynyń «Shákárimtaný: izdenister men jetistikter» atty maqalalary arqyly Shákárim Qudaıberdiulynyń aqtalǵannan beri shyǵarmashylyǵynyń halyqqa jetýi, taralýy men ádebıet salasyndaǵy aqyn murasynyń zerttelýi haqynda tanymdyq dúnıelerge qanyǵýǵa bolady.
Qyzyǵýshylyq tanytqan oqyrmandar Ǵarıfolla Esimniń «Solon jáne Shákárim», Mekemtas Myrzahmetulynyń «Shákárimdegi jantaný ilimi», Sıırt ýnıversıtetiniń (Túrkııa) fılosofııa doktory (PhD) Ilııas Erpaıdyń «Din tazasyn dinnen izde» maqalalarymen birge oıshyl Shákárimniń fılosofııasyna úńile alady.
Qýat QIYQBAI,
Abaıdyń «Jıdebaı-Bórili»
qoryq-mýzeıiniń ǵylymı qyzmetkeri
