Qazaq halqynyń ótken ǵasyrdyń basyndaǵy turmys-tirshiligi, kásibi men qolóneri, ulttyq salt-dástúr, ádet-ǵuryptary beınelengen fotosýretterdiń avtorlary S.Rýdenko jáne F.Fıelstrýp. 1926 jyly KSRO Ǵylym Akademııasynyń Odaqtyq jáne avtonomııalyq respýblıkalardy zertteý jónindegi erekshe Komıtetiniń professor S.Rýdenko bastaǵan Antropologııalyq otrıady Aqtóbe gýbernııasy men Adaı úıezine dalalyq ǵylymı-zertteý ekspedısııasyn júrgizgen. Oıyl, Saǵyz ózenderiniń ańǵaryndaǵy kishi júzdiń kóshpeli jáne jartylaı kóshpeli qazaqtarynyń mádenıeti men turmysyn jan-jaqty zerttegen ǵalymdardyń eńbekteri endi kitaptan kórinis taýyp otyr.
-Jalpy Atyraý óńiriniń tarıhyna qatysty, onyń ishinde ólkeniń baıyrǵy turǵyndary - qazaqtarǵa qatysty anyqtalǵan fotosýretter óte az. Al olardy izdep-tabý arnaıy arheografııalyq izdenis jumystaryn qajet etedi, - deıdi Atyraý oblysy tarıhı-mádenı murany qorǵaý, qalpyna keltirý jáne paıdalaný jónindegi memlekettik ınspeksııasynyń basshysy Muhambetqalı Kıpıev.
-Reseıdiń federaldyq arhıvterinde bir istegi materıaldyń 30 paıyzyn ǵana kóshirýge ruqsat etedi. Kitap-albomǵa engen arhıv Reseı Ǵylym Akademııasyna qaraıtyn bolǵandyqtan jáne biz atalǵan qujattardy jaryqqa shyǵaratynymyzdy aıtqandyqtan, arhıv ákimshiligi Antropologııalyq otrıadtyń 300-den astam fotosýretten turatyn albomynan 200 fotosýretti kóshirmeleýge ruqsat berdi.
Albomdaǵy 150 sýret buryn esh jerde jarııalanbaǵan. Uıymdastyrýshylar aldaǵy ýaqytta qundy sýretterdiń qataryn kóbeıtip, úsh tilde shyǵarýdy josparlap otyr. Al ázirge qolda bar 500 dana basylym oblystaǵy barlyq kitaphanalarǵa taratylatyn bolady.
ATYRAÝ
