Oblystyq densaýlyq saqtaý basqarmasynyń basshysy Mánshúk Aımurzıeva 2017 jyly akýsherlik qyzmette 66 daǵdarysty jaǵdaıat bolǵanyn aıtty. О́kinishtisi, jasóspirimder arasyndaǵy júktilik qalypty jaǵdaıǵa aınalyp keledi. Byltyr mektep jasyndaǵy 164 qyz bala júkti retinde esepke turyp, 91-i ómirge sábı ákelgen. 15-i túsik jasatypty. Kóńilge kóleńke túsirer osy jaıtqa alańdaǵan Parlament Májilisiniń depýtaty Beıbit Mamraev Elbasynyń «Rýhanı jańǵyrý» baǵdarlamasynyń osy problemanyń aldyn alýǵa da qatysy bar. Otan otbasynan bastalady. Ár otbasynda ulttyq qundylyqtarymyz saltanat qursa, salt-dástúrimizden aýytqymasaq, qyzdarymyz mundaı keleńsizdikterge tap bolmas edi, dedi. Jasóspirimderdiń tym erte júkti bolý derekteriniń, ásirese, aýyldarda beleń alyp otyrǵany tárbıe máselesine áli de jete mán berý qajettigin kórsetedi.
Sońǵy jyldary Atyraý oblysynda ana ólimi artyp otyr. О́tken jyldyń ózinde eki ana ólimi tirkeldi. Oblystyq densaýlyq saqtaý basqarmasynyń basshysy bul qaıǵyly jaıttarǵa bala kóteretin jastaǵy áıeldermen jumystyń jetkiliksizdigi, túrli aýrýlardyń ýaqytynda anyqtalmaýy, júktiliktiń josparlanbaýy sebep bolǵanyn jasyrmady. Emdeý sharalary men konsılıýmdardyń ýaqtyly uıymdastyrylmaýy, dıagnostıka hattamasynyń saqtalmaýy da ókinishti jaǵdaılarǵa ákep soqqan.
Bala ólimi kórsetkishi azaıdy degenmen, byltyr bir jasqa deıingi 109 sábıdiń ómirden ótýi bul baǵyttaǵy jumystardy áli de jetildire túsýdi talap etedi. Shetinegen sharanalardyń 56 paıyzyna perınataldyq kezeńdegi sebepter áser etse, týabitti aýrýǵa shaldyqqandar men ınfeksııalyq aýrý saldarynan kóz jumǵandar da bar. Byltyr oblysta 17 bala Daýn sındromymen ómirge keldi, tórt sábıden hromosomalyq patologııa anyqtalǵan. Máseleniń bárine dárigerlerdi kináli dep qaraýǵa da bolmaıdy. Densaýlyqtaryna mán bermeıtin, ýaqytynda tekserýlerden ótpeıtin júkti áıelder qatary azaımaı otyr. Dinı senimderine baılanysty medısınalyq tekserýden ótýden bas tartatyn áıelderdiń de bary belgili. Jańa týǵan sábılerge ekpe salýǵa qarsy ata-analardyń sany ótken jyly 16 paıyzǵa artqan.
Jastar men jasóspirimderdiń reprodýktıvtik, jynystyq, psıhıkalyq densaýlyqtaryna mán beretin áleýmettik-medısınalyq qyzmetter de jetkiliksiz.
Aımaqtaǵy densaýlyq saqtaý salasynda birqatar ilkimdi isterdiń jasalyp jatqanyn joqqa shyǵarýǵa bolmaıdy. Mysaly, oblystyq balalar aýrýhanasynda ashylǵan katamnestıkalyq kabınette byltyr 597 bala em alǵan. Bul óz kezeginde shala týǵan náresteler arasyndaǵy ólimniń azaıýyna oń yqpal etip otyr. 220 medısına qyzmetkeri biliktiligin arttyrdy. Densaýlyq saqtaý mekemeleri zamanǵa saı qural-jabdyqtarmen qamtylyp keledi.
Baqytgúl BABASh,
«Egemen Qazaqstan»
ATYRAÝ
