Astana qalasy ákiminiń birinshi orynbasary Sergeı Horoshýn jaıaý júrginshiler joly máselesin sheshý men jaıaý júrginshiler jolyndaǵy qaýipsizdik sharalaryn qamtamasyz etý boıynsha ákimniń tapsyrmasy qalaı oryndalyp jatqany jóninde baıandady.
«Jolaýshylar tasymaldaý basqarmasy men Astana qalasy IID ÁPB birlesip, baqylanbaıtyn qaýipti jaıaý júrginshiler ýchaskesin anyqtady. Olardyń jalpy sany – 104. Onyń ishinde transport qıylysynda ornalasqan 16-na jobalaý-smetalyq qujaty daıyndaldy, al qalǵan 88-i – jaıaý júrginshiler joly. Bularǵa da IID ÁPB kelisip shema jasalmaq», – dep habarlady S.Horoshýn.
Esterińizge sala keteıik, Astana ákimi Áset Isekeshev 2018 jyly jaıaý júrginshiler jolyna qatysty qaýipsizdik máselesin qamtamasyz etýdi tapsyrǵan bolatyn. Iаǵnı barlyq magıstraldi joldaǵy jaıaý júrginshiler jolyn alyp tastap, baǵdarsham ornatýdy, kedergisiz biriktirilgen «jasyl tolqyn» dep atalatyn avtotransport aǵymyn qamtamasyz etý. Al kishigirim kóshelerdegi jaıaý júrginshiler jolaǵyn qaldyryp, oyn jaryqtandyrý kerektigin aıtqan-dy. Bul máseleni de osy 2018 jyly sheshýi tıis.
Áset Isekeshev aýdan ákimderine qarata avtobýs aıaldamalaryn bilim, densaýlyq saqtaý, áleýmettik qorǵaý basqarmalarymen birlesip, jyly aıaldamalar ornatatyn oryndy josparlaý kerektigin aıtty. Bárinen buryn olardyń ornalasqan jeri múmkindigi shekteýli adamdar úshin qolaıly, mektepke, aýrýhanaǵa, basqa da áleýmettik nysandarǵa jaqyn bolýy kerek. Bıyl kúz ben qys aıy jaqyndaǵansha qajetti jerlerge jyly aıaldamany ornatyp úlgerý qajet.
Osyǵan baılanysty, ákim Sergeı Horoshýnge bir aptanyń ishinde aıaldamanyń tizimi men josparyn bekitip, jobany iske asyrýdy tapsyrdy.
Al tótenshe jaǵdaı, sanıtarlyq-epıdemıologııalyq, qala tirshiligindegi aǵymdaǵy nysandardyń ahýaly jáne jylý maýsymynyń barysy týraly qala ákiminiń orynbasary Qosman Aıtmuhametov baıandady. Onyń aıtýynsha, ótken aptada tótenshe jaǵdaılar tirkelgen joq, juqpaly aýrýlar boıynsha epıdemıologııalyq ahýal turaqty, jaǵdaı baqylaý deńgeıinen asyp ketpegen. Astanada jylý maýsymy shtattyq rejımde ótip jatyr. Energııa kózderi janar-jaǵarmaı qoryndaǵy normatıvpen qamtamasyz etilgen.
Qylmystyq ahýal men astanadaǵy quqyqtyq tártipti qamtamasyz etýde qoldanǵan sharalar jóninde qalanyń IID basshysy Marat Qojaev esep berdi.
«Astanada operatıvti jaǵdaı turaqty. О́tken aptada 502 qylmys tirkeldi. Bul ótken aptamen salystyrǵanda 101 oqıǵaǵa az jáne ótken jylmen salystyrǵanda 326 oqıǵaǵa azaıǵan. Qylmystyń izin sýytpaı 73 oqıǵa ashyldy, buryn jasalǵany – 41, ótken jylǵysy – 25. Sot pen tergeýden qashyp júrgen 9 qylmysker ustaldy, iz-túzsiz joǵalyp ketken 5 adam tabyldy. Ýaqytsha tergeý ızolıatoryna 39 adam jiberildi», – dedi M.Qojaev.
Beınebaqylaý kamerasynyń kómegimen 14 qylmys anyqtalyp, 1 303 ákimshilik quqyq buzýshylyq anyqtaldy.
Quqyq buzbaýdaǵy «Nóldik tózimdilikti» engizý jumystary jalǵasýda. 1 142 ákimshilik quqyq buzýshylyq anyqtaldy, onyń 75-i usaq buzaqylyq, 85 – tynyshtyqty buzý, 256 – alkogoldi ishimdik ishý, qoǵamdyq oryndarda masań kúıde júrý, bekitilmegen jerlerde 303 temeki shegý oqıǵasy, 394 – abattandyrý erejesin buzý, belgilenbegen orynda saýda jasaý – 29.
Dári-dármek pen onyń qory týraly Densaýlyq saqtaý basqarmasynyń basshysy Kamaljan Nadyrov baıandady.
Aıtýynsha, qalanyń barlyq stasıonary qajetti dári-dármekter qorymen jáne medısınalyq quraldarmen jabdyqtalǵan. Dári-dármekpen qamtamasyz etý únemi baqylaýda tur.
Qalanyń qoǵamdyq transportynyń jumysy jaıly «Astana LRT» JShS basqarmasynyń tóraǵasy Bekmyrza Igenberdınov aıtyp shyqty.
Áset Isekeshev halyqtyń tarapynan qoǵamdyq kóliktiń jumysyna qatysty áli de kóptegen saýaldary baryn aıta ketti. Osyǵan baılanysty, kásibı júrgizýshilerdi tartý boıynsha jumysty kúsheıtý qajettigin, kásibı daıyndyqty qamtamasyz etip, halyqqa yńǵaısyzdyq týdyrmas úshin avtobýstardyń ýaqtyly óz lınııasymen júrý kerektigin alǵa tartty. Sondaı-aq, atqarylyp jatqan jumystar jóninde apta saıyn esep berip turýyn tapsyrdy.
Apparat otyrysynda qalany abattandyrý máselesi boıynsha Almaty, Esil, Saryarqa aýdany ákimderiniń baıandamalary da tyńdaldy.
