Poltoranınnen júlde kútemiz
Almatydaǵy «Komplıt-Servıs» halyqaralyq týrıstik kompanııasynyń prezıdenti Ábilhan Sársenbaevpen, onyń menedjerleri Asqar, Eraly, Abzalmen kún saıyn derlik kezdesip qalamyz. Olar qazaqstandyq jankúıerlerdiń biri kelip, kelesileri attanyp jatqanyn, olardyń ornyn basqan týrısterdiń Phenchhan men Kannyndaǵy qonaqúılerge ornalasyp jatqanyn, Olımpıadaǵa eki júzge tarta týrıstiń kelgenin tilge tıek etti. Tipti kúni keshe ataqty shańǵyshymyz Vladımır Smırnov qonaq retinde Olımpıada qalashyǵyna kelip, qazaqstandyq sańlaqtarmen kezdesip, olarǵa sáttilik tiledi. Lıllehammer Olımpıadasynyń qaharmany V.Smırnov izbasary Alekseı Poltoranınge ystyq yqylasyn bildirip, qazaqstandyqtardyń ózinen tek jeńis kútetinin aıtty.
Jankúıerlerdiń esine sala keteıik, 24 aqpanda Astana ýaqytymen 11.00-de 50 shaqyrymdyq marafon bastalyp, ol telearnalardan kórsetiledi. Klassıkalyq ádispen júgirýdiń maıtalmany Alekseıdiń baǵy qashanǵy baılana bermek, óziniń tórtinshi Olımpıadasynda namysty janyp, elimizdiń kók týyn jelbiretedi degen úmittemiz. Marafonda Alekseıdiń basty qarsylasy fın shańǵyshysy Iıvo Nıskanen ǵana bolady dep boljanyp otyr, qos sańlaqtyń jeńis koeffısıenti 4-ke teń.
Sonymen 16 jáne 17 aqpanda jerlesterimiz qalaı óner kórsetti? Týrasyn aıtaıyq, kóńil kónshitpeıdi. Denıs Ten týraly aıttyq, 27-orynmen jarystan shyǵyp qaldy. Taý shańǵyshysy Marııa Grıgorova slalomda óner kórsetip, birinshisinde 54-shi, al ekinshi júgirisinde 54-oryndy ıelendi. Al jasy kelip qalǵan Igor Zakýrdaevtan medal kútýdiń ózi kúlkili, sýpergıgantta nebári 41-oryndy qanaǵat tutty. 15 shaqyrymdyq erkin ádispen júgirýde shańǵyshylarymyz Vıtalıı Pýhkalo, Evgenıı Velıchko, Denıs Volotka 54, 61, 64-shi oryndarǵa syrǵydy. Shańǵymen tuǵyrdan sekirýshi Sergeı Tkachenko da irikteýden ótkenimen, odan keıin jaqsy nátıje kórsete almady.
Senbide, ıaǵnı 17 aqpanda da qazaqstandyqtarǵa sáttilik serik bolmady. Bul kúni jerlesterimiz sporttyń úsh túri boıynsha óner kórsetti. Short-trekten 1500 metrlik qashyqtyqta synǵa túsken Anastasııa Krestova penaltı alyp, jarystan shyǵyp qalsa, Ońtústik Koreıadan attaı qalap shaqyryp alǵan Kım Iong A tórtinshi kelip, jartylaı fınalǵa óte almady. Frıstaıldyń akrobatıka túrinen baq synaǵan Ildar Badrýtdınov ta jarysty erte aıaqtady. Al keshe Alekseı Poltoranın bastaǵan shańǵyshylar Vıtalıı Pýhkalo, Evgenıı Velıchko jáne Denıs Volotkoı estafetalyq jarysta segizinshi oryn aldy. Básekeni Poltoranın jaqsy bastap berdi. О́ziniń aınalymynda márege birinshi kelgenimen, onyń jeńisti jolyn quramadaǵy áriptesteri jalǵaı almady. Sóıtip bizdiń sportshylar estafeta jeńimpazy atanǵan Norvegııa quramasynan 3 jarym mınýt artta qalyp qoıdy.
Mońǵolııa azamattary – bizge jankúıer
Olımpııa oıyndary kezinde jerlesterimizge jankúıer bolǵan Mońǵolııa azamattaryn da kezdestirdik. Sonyń biri – Mońǵolııadaǵy taý-ken assosıasııasynyń prezıdenti Damba myrza. Kezinde Reseıde bilim alǵan, qazaqstandyq áriptesterimen qarym-qatynastaǵy azamat jubaıy Batjarǵal, jıeni Moıh Erdenemen birge Galysheva qola medal alǵan kúni bizben birge tileýles boldy. Shyn yqylasymen quttyqtaǵan Damba myrza:
– Bizde qysqy sport damı bastady. Azııa oıyndary men halyqaralyq jarystarda top jarmasaq ta, tájirıbe jınap jatyrmyz. Osy joly Olımpıadaǵa eki sportshy keldi. Mońǵolııanyń týyn alyp shyqqanyn kórgen shyǵarsyzdar. Qazaqstannyń jetistigine biz de qýanamyz. Eki el arasynda ekonomıkalyq saýda-sattyq órkendep keledi. Prezıdentimiz sportty erekshe jaqsy kóredi, sambo kúresinen álem chempıony atanǵan. Qazaqstanǵa degen ystyq yqylasy da aıtarlyqtaı. El basqarýǵa kelgen ótken jyly qazaq azamattaryna senim bildirip, laýazymdy qyzmetterge taǵaıyndady, – dedi.
Ońdasyn ELÝBAI,
jýrnalıst, arnaıy
«Egemen Qazaqstan» úshin
Phenchhannan (Ońtústik Koreıa)
