Bul joba Elbasy Nursultan Nazarbaevtyń «Rýhanı jańǵyrý: bolashaqqa baǵdar» maqalasynda aıtylǵan «Týǵan jer» baǵdarlamasy aıasynda bastalyp, Jetisý óńirinde dúnıege kelgen qalamgerlerdiń úsh býyn ókiliniń basyn qosatyn turaqty shara bolmaq. Ádebı sharanyń alǵashqy qonaqtary bolyp búgingi qazaq prozasy men poezııasyn bederli qoltańbalarymen bedel bıigine kóterip júrgen aqyn-jazýshylar Jumabaı Shashtaıuly, Dáýren Qýat jáne Aınur Tóleý shaqyryldy. Jergilikti zııaly qaýym ókilderi men stýdent jastardyń kózaıymyna aınalǵan kezdesýde qonaqtar ádebıet týraly tolǵamdy oılaryn ortaǵa saldy.
Erkin formatta ótkizilgen ádebı sharanyń alǵashqy saýaly Halyqaralyq «Alash» ádebı syılyǵynyń laýreaty, jazýshy, «Egemen Qazaqstan» gazetiniń sholýshysy Jumabaı Shashtaıulyna qoıyldy. Jazýshy, abai.kz aqparattyq portalynyń bas redaktory Dáýren Qýat ta súbeli oılarymen bólisip, ómir jolynan syr shertti. Kópshilik tarapynan qoıylǵan saýalǵa da tartymdy jaýap qaıyrdy. Munan soń jastar tarapynan qoıylǵan saýalǵa oraı Jambyl aýdandyq «Atameken» gazeti bas redaktorynyń orynbasary, aqyn Aınur Tóleý de óziniń oramdy oılaryn ortaǵa saldy.
Osylaısha jazýshy, jýrnalıst Esbolat Aıdabosyn júrgizgen rýhanı áńgimede qalamgerler shyǵarmashylyq laboratorııa, ádebıet pen ıdeologııa, rýhanııatty baıytýdaǵy ádebıettiń róli, saýatty oqyrman qalyptastyrý, ádebı syndy damytý jáne basqa da taqyryptarda keleli áńgimeler qozǵap, stýdent jastar men ádebıet súıer qaýymnyń saýaldaryna jaýap berdi. Al eki saǵat boıyna qalamgerler men oqyrmandar arasynda alǵaýsyz syr bólisken sharanyń toqeterinde Almaty oblysynyń tilderdi damytý jónindegi basqarmasynyń basshysy Aıdar Bashbaev: «Ádebıet – rýhanııat dińgegi» jobasy jyl boıy jalǵasyp, qazaq ádebıetinde qoltańbasy bar aǵa býyn, orta býyn jáne jas tolqyn ókilderiniń basyn qosyp, rýhanııat jaıly áńgime órbitetin ashyq alańǵa aınalady dep otyrmyz. Jetisýlyq qalamgerlerdiń eldi rýhanı jańǵyrtýǵa, týǵan jerdiń túleýine úles qosýyna barlyq jaǵdaı jasaımyz», dedi.
Qalmahanbet MUQAMETQALI,
«Egemen Qazaqstan»
Almaty oblysy
