Basqosýǵa Qazaqstan Respýblıkasy Prezıdentiniń kómekshisi – Qaýipsizdik Keńesiniń hatshysy Vladımır Jumaqanov, Parlament depýtattary, Qorǵanys jáne aeroǵarysh ónerkásibi mınıstrliginiń jáne basqa da memlekettik organ, baǵynysty uıymdar men kásiporyndar basshylyǵy qatysty.
Búgingi tańda mınıstrlik eldiń qorǵanysy men qaýipsizdigin tıimdi túrde iske asyrýǵa múmkindik beretin salanyń normatıvtik-quqyqtyq bazasyn qalyptastyrý jumystaryn júrgizýde.
Memlekettik qorǵanystyq tapsyrysty qalyptastyrýdyń jańa mehanızmderin retteıtin jáne otandyq qorǵanys-ónerkásip keshenin qoldaý sharalaryn qarastyratyn «Qorǵanys ónerkásibi jáne memlekettik qorǵanystyq tapsyrys» zań jobasy Parlamenttiń qaraýyna engizildi.
2018 jyldan bastap Qorǵanys mınıstrliginiń qorǵanystyq tapsyrys bıýdjeti QAО́M-ge ótedi. Bul áleýetti organdardy ózine tán emes fýnksııalardan bosatady jáne qorǵanys-ónerkásip kesheni kásiporynnyń ilgerlemeli damýyn qamtamasyz etedi.
Qorǵanys pen qaýipsizdikti qamtamasyz etý úshin memlekettiń jańa tehnologııalyq múmkindikterin qurýǵa baǵyttalǵan salanyń tujyrymdamalyq negizderi júzege asyrylýda.
Mınıstrliktiń basty jumys baǵyttary qataryna Qazaqstannyń qorǵanys pen ulttyq qaýipsizdik salasyndaǵy máselelerdi sheshý úshin qarý-jaraqtyń jańa jáne perspektıvti túrlerin, tehnıkany óndirýdiń jáne qyzmetterdi kórsetýdiń tolyq sıklin basqarý da jatady.
«Egemen-aqparat»
