– Biz nege erterek kezdespedik eken, á? – dedi kelinshek qoshtasar sátte muńaıyp.
Onyń úninde ókinishpen birge sanatorııde ótkizgen muńsyz, qamsyz tátti kúnderdiń ystyq lebi de bar edi.
Sonsoń uzyn kirpigin taǵy bir qaǵyp, basyn sál ǵana ıip, qoshtasý belgisin jasady da, taksıge otyrdy.
Ol uzap ketkende tup-týra on kúnge sozylǵan saýyq-saıran, oıyn-kúlki aıaq astynan sap tyıylyp, bul ózin japan dalada jalǵyz qalǵandaı sezindi. Sodan da bolar, «Endi... bir-eki kúnnen keıin men de jolǵa shyǵarmyn», dep jubatty ózin.
Biraq, kúndelikti prosedýralarǵa baratyn kezdegi kóterińki kóńil-kúıi búgin jaz ótip, kúz kelgenin sezgendeı báribir jabyrqap qaldy.
«Biz nege erterek kezdespedik eken, á?..».
Ádemi kelinshektiń ystyq demi betinen taǵy bir óbip ótkendeı boldy.
«Kim bilsin, – dep oılady ol basyn aqyryn ǵana shaıqap. – Biz, bálkim, buryn da kóshede nemese metroda bir-birimizdi kórip júrgen bolarmyz. Biraq, moıyn buryp qaraýǵa, bir-eki aýyz til qatysyp, tanysýǵa murshamyz kelmegen shyǵar. Sebebi úlken qalanyń ıirimi qatty. Shyrkóbelek aınaldyryp, es jıǵyzbaıdy. Al munda... aınalańdaǵy dúnıeni jańa kórgendeı bolasyń».
Azdan soń úlpildegen aq súlgisin moınyna orap, mıneraldy vannalar ornalasqan korpýsqa qaraı bet aldy.
Kenet qos jıegin jap-jasyl jelek kómkergen uzyn-shubaq beton trotýarǵa tyq-tyq qadalǵan biz ókshe týflıdiń dybysyn estip, artyna burylyp edi, sanatorııge emdelýge keletin kisilerdi tirkeıtin bólimge qaraı bara jatqan suńǵaq boıly, symbatty, sulý kelinshekti kórdi.
Ol da buǵan jalt qarap, áp-sátte kóńil kózimen synap ta, baǵalap ta úlgergendeı boldy.
* * *
Yp-ystyq mıneraldy vannadaǵy shymyrlaǵan sý túıirshikterine qarap jatyp ózinen-ózi: «Janary ótkir, tákappar jan eken, – dep oılady jańa ǵana kórgen sulý kelinshek týraly. – Biraq, syrttaı sabyrly bolǵanymen, ishteı ázil-qaljyńǵa, oıyn-saýyqqa qumar ekeni beseneden belgili. Pende shirkin, bar qazynasyn tereńge jasyrǵan qupııa shatqal emes pe...».
Ol tańerteńgi muńnyń tús bolmaı jatyp seıilip, kóńilshek bulttaı jep-jeńil kóshe jónelgenine tańǵaldy.
Sonsoń:
«Jo-joq, ketý kerek, – dedi shym-shym etip, shymyrlap shyǵyp, kózdi ashyp-jumǵansha tez ǵaıyp bolyp jatqan mıneraldy sý búrshikterine qadala qarap jatyp. – Ketý kerek!..».
Nurǵalı ORAZ,
«Egemen Qazaqstan»
