Qara kúzde jaýǵan mol jańbyrdan keıin, topyraq qabatyndaǵy tońnyń qalyńdyǵy 20-50 santımetr tereńdikte bolǵandyqtan erigen qar sýy sińbeı, jylǵa-jylǵany qýalaı aǵyp jatyr. Qyzyl sýdyń kenetten kóterilýi taý etegindegi aýyldardy ábigerge salýda. Ásirese oıpańda ornalasqan aýdandardaǵy jekelegen úılerdiń aýlasyn sý shaıyp, kósheler tasqynnyń astynda qaldy. Apta basynda Taldyqorǵan qalasyndaǵy «Qyzyltas» saıajaıyn erigen sý shaıyp ketip, tótenshe jaǵdaı týyndasa, Ile aýdanyndaǵy Ashybulaq aýyldyq okrýgi aýmaǵynda da birneshe aýylǵa qyzyl sý jaıylyp, turǵyndar jergilikti bılikten kómek suraýǵa májbúr boldy.
Sońǵy eki kún boıyna Almaty qalasy mańyndaǵy Eńbekshiqazaq, Talǵar, Qarasaı, Jambyl aýdandarynyń birneshe aýylynda sýdan qutqarý jumystary tolassyz júrip jatyr. Almaty oblystyq Tótenshe jaǵdaılar departamentiniń málimetinshe, aqpannyń 27-28 kúnderi Jambyl aýdanynyń Uzynaǵash, Qaınazar aýyldaryndaǵy jaǵdaı kúrdelenip, jergilikti deńgeıde tótenshe jaǵdaı jarııalanǵan. Qazir aýdandaǵy sýdan qutqarý jumystarymen arnaıy shtab aınalysyp jatyr. Abyroıy bolǵanda adam shyǵyny joq. Al aýlasyna sý jaıylyp, úılerine sý kirgen turǵyndarǵa kómek kórsetilýde. Aýyldar taý etegindegi ornalasqandyqtan sel júrý qaýpi áli de joǵary. Aýmaqtaǵy ózender men dambalar qatań baqylaýǵa alynǵan.
Al bir táýlik ishinde Talǵar aýdanynda 62 úıdiń aýlasyn sý shaıyp, turǵyndar arnaıy tehnıka men mamandandyrylǵan toptyń qyzmetine júgingen. Qarasaı aýdanynda da 82 úıge qyzyl sý kirý qaýpi týyndap, tıisti sharalar jasalǵan. Eńbekshiqazaq aýdany, Báıterek eldi mekenindegi 15 úıdiń turǵyndary da erigen qar sýynyń qursaýynda qalyp, qutqarýshylarǵa qońyraý shalǵan eken.
– 27 aqpan kúni keshkisin Talǵar aýdanynyń Tuzdybastaý aýyly mańyndaǵy oıpatqa jınalǵan qar sýynyń kólemi 50 tekshe metr asyp ketip, aýyl turǵyndarynyń ómirine qaýip tóndirdi. Qutqarý qyzmeti jedel áreket etip, qaýipti kóshelerden 205 úıdiń turǵyndary kóshirildi. Myńǵa jýyq adamnyń qaýipsizdigi qamtamasyz etildi. Sol sııaqty Jambyl aýdanynyń Uzynaǵash aýylynda 120 úıdi, Qaınazar aýlynda 50 úıdi sý basý qaýpinen saqtandyryp, arnaıy mamandar túni boıy kezekshilik jasady, - dep habarlady bizge oblystyq tótenshe jaǵdaılar departamenti baspasóz qyzmetiniń ókili Azamat Jurtbaev.
Qazir oblystyń barlyq aýdandarynda arnaıy shtabtar qurylyp, sý tasqynyna qarsy sharalar qolǵa alynyp jatyr. Al qar kóshkini qaýpi men aǵyn sý qaptaýy múmkin aýmaqtarda oblystyq tótenshe jaǵdaı departamentiniń qutqarý otrıadtary, «Qazseldenqorǵaý» mekemesiniń mamandary jáne ishki ister organdary qyzmetkerleri men áskerılerden qurylǵan arnaıy top kezekshilik etýde.
Qalmahanbet MUQAMETQALI,
«Egemen Qazaqstan»
Almaty oblysy.
