Otyrysta «Qazaqstan Respýblıkasynyń keıbir zańnamalyq aktilerine saqtandyrý jáne saqtandyrý qyzmeti máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy. Zań jobasyn talqylaý kezinde depýtattar shetelge shyǵatyn kezdegi týrısti saqtandyrý máselesine basa nazar aýdardy. Halyq qalaýlylarynyń pikirinshe, shetelge shyqqanda týrıster óz problemalarymen ózderi ǵana qalmaýy kerek. Osy oraıda Májilis Tóraǵasy:
– Bizdiń kóptegen azamattarymyz qazirgi ýaqytta óz demalystaryn týrıstik joldama boıynsha shetelde ótkizedi. Árıne ol jaqta júrgen kezde túrli jaǵdaılar bolýy múmkin. Aýyryp qalady nemese ushaqqa baılanysty basqa da jaǵdaılar oryn alýy múmkin. Biraq ta eń bastysy – týrıstik joldama boıynsha shetelde júrgen azamattarymyzdy osy kezeńde tolyqtaı saqtandyrý kerek. Sondyqtan osy máseleni ekinshi oqylymǵa deıin qaraýymyz qajet, – dedi.
Atalǵan zań jobasy boıynsha negizgi baıandama jasaǵan Ulttyq bank tóraǵasy Danııar Aqyshev qoldanystaǵy zań negizinen týrıstiń emes, týroperator men týragenttiń múliktik múddelerin qorǵaýǵa baǵyttalǵanyn, endigi jerde, osy zań jobasyna sáıkes, qazaqstandyq týrısterdi qorǵaý maqsatynda týrıstik fırmalardyń shetelge shyǵatyn týrısti mindetti saqtandyrýyn júzege asyrý kózdelip otyrǵanyn jetkizdi. Onyń aıtýynsha, osy zań jobasy erikti saqtandyrý júıesi, mindetti saqtandyrý isi, sondaı-aq saqtandyrý naryǵynyń ınfraqurylymyn damytý boıynsha saqtandyrý uıymdarynyń qyzmetin reglamentteıtin zańnamalyq aktilerdi keshendi túrde qaıta qaraýdy kózdeıdi. Atap aıtqanda, olar: mindetti saqtandyrý júıesinde onlaın-saqtandyrý tetigin engizý, saqtandyrý sharttaryn zańmen emes taraptardyń kelisimimen aıqyndaý, týrısterdiń táýekelderin saqtandyrý júıesin qaıta qaraý, sondaı-aq saqtandyrý agentteri qyzmetiniń ashyqtyǵyn qamtamasyz etý.
Sonymen qatar zań jobasynda erikti saqtandyrý júıesinde zeınetaqy annýıtettik saqtandyrýdy odan ári damytý kózdelse, saqtandyrý naryǵynyń ınfraqurylymyn damytý júıesinde saqtandyrý tólemderine kepildik berý tetigin jetildirý, saqtandyrý ombýdsmeniniń qyzmet aıasyn keńeıtý, saqtandyrý sharttary boıynsha etalondyq derekqordy qalyptastyrý, aktýarlyq qyzmetti damytý usynylady.
Sondaı-aq jalpy otyrysta «Qazaqstan Respýblıkasynyń keıbir zańnamalyq aktilerine menshik quqyǵyn qorǵaýdy kúsheıtý jáne tórelik máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy. Atalǵan zań jobasy boıynsha negizgi baıandamany Ádilet mınıstri Marat Beketaev jasady.
Jıynda aıtylǵandaı, bul zań jobasy mynadaı máselelerdi keshendi sheshýge baǵyttalǵan. Banktik qaryz berýmen jáne oǵan qyzmet kórsetýmen baılanysty banktik shotty júrgizgeni úshin, sondaı-aq banktik shotqa qaryzdy esepke jatqyzǵany úshin komıssııa alýǵa tyıym salý usynylady.
Budan bólek, kásipkerlik qyzmetti júzege asyrýmen baılanysty emes jáne jyljymaıtyn múlik kepilimen qamtamasyz etilgen ıpotekalyq qaryz sharttary boıynsha merzimdi ótkizip alǵanǵa 180 kún ótkennen keıin esepke jatqyzylǵan syıaqyny alýǵa tyıym salýdy belgileý qarastyrylady.
Arnaıy shottar bolǵan kezde balalardy kútip-baǵýǵa arnalǵan alımenttik tólemderge óndirip alýdy qoldanýǵa ımmýnıtet belgileý, memleket muqtajy úshin alyp qoıylatyn múliktiń qunyna teń baǵamen ótem jasaý negizderin birizdendirý de qaralǵan.
Naqtylaı aıtqanda, Zań jobasynda memleket muqtajy úshin alyp qoıylatyn múliktiń qunyna ótem jasaý úshin teń baǵamen óteýdiń sharttaryn jasaý arqyly biryńǵaı negizderdi belgileý, atap aıtqanda: jer ýchaskesin alyp qoıý kezinde óteý mólsheri múliktiń naryqtyq quny boıynsha aıqyndaý, memleket muqtajy úshin múlikti alyp qoıý kezinde ózge jer ýchaskesin berý jolymen «zattaı óteý» (qundy óteý balamasy) múmkindigi usynylady. Sottalǵan adamnyń múlkin arnaıy (zattaı) tárkileý ınstıtýtyn iske asyrý máseleleri de qaraldy.
Jalpy otyrysta, sonymen qatar «Qazaqstan Respýblıkasynyń keıbir zańnamalyq aktilerine kásipkerlik qyzmetti retteýdi jetildirý máseleleri boıynsha ózgerister men tolyqtyrýlar engizý týraly» zań jobasy men «Qazaqstan Respýblıkasynyń keıbir zańnamalyq aktilerine halyqtyń jumyspen qamtylýy jáne kóshi-qon máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy. Bul eki zań jobasy boıynsha negizgi baıandamalardy sáıkesinshe Májilistiń Ekonomıkalyq reforma jáne óńirlik damý komıtetiniń múshesi Sáken О́tebaev pen Áleýmettik-mádenı damý komıtetiniń múshesi Káribaı Musyrman jasady.
Sonymen qatar otyrys barysynda Qazaqstan Respýblıkasy Ortalyq saılaý komıssııasynyń múshesi Natalıa Godýnovanyń ókilettigin merziminen buryn toqtatý týraly qaýly qabyldandy.
Plenarlyq otyrystyń sońynda depýtattar ortalyq memlekettik organdardyń basshylaryna birqatar depýtattyq saýaldar joldady.
Joldybaı BAZAR,
«Egemen Qazaqstan»
