Oblystyq jolaýshylar kóligi jáne avtomobıl joldary basqarmasy basshysynyń orynbasary Erlan Jańabaevtyń aıtýynsha, sońǵy jyldary Qyzylorda qalasy jáne aýdan ortalyqtarynda jolaýshylardy zańsyz tasymaldaýshylardyń sany artty. Máselen, 8 jáne 11 orynǵa laıyqtalǵan "Hýndaı Stareks" (Ońtústik Koreıadan shyǵarylatyn) markaly 100-ge jýyq avtokólik ıeleri Shıeli kentinen Qyzylorda qalasyna jolaýshylardy zańsyz tasymaldap kelgen.
"Bul azamattardyń qyzmetinde qaýipsizdik sharalary saqtaýǵa qatysty óreskel zań buzýshylyqtar bar. Birinshiden, olarda saqtandyrý polısteri, ekinshiden, jolaýshy tasymaldaýǵa arnalǵan lısenzııalary joq. Kólikteri tasymaldaýshylar reestrine engizilmegen, marshrýt baǵyty men ýaqyty naqtylanǵan grafık joq. Júrgizýshiler medısınalyq baqylaýdan, al kólikteri tehnıkalyq tekseristen ótpegen. Sondyqtan, mundaı tasymaldaýshylar adamdardyń ómirine úlken qaýip týdyrady", - dedi Erlan Jańabaev.
Zańsyz tasymaldaýshylarǵa túsindirme jumystary júrgizildi.
"Biz tasymaldaýshylarmen kezdesip, túsindirme jumystaryn júrgizdik. Olarǵa zań talaptaryna saı jumys jasaý úshin jyl sońyna deıin avtokólikterin aýystyrýǵa ýaqyt berdik. 16 oryndy avtobýs bolýy qajet. Sonymen qatar, osy ýaqytta olar barlyq qujattaryn zańǵa sáıkes retteýi kerek. Olardyń kólikterin nesıege alyp, otbasyn asyrap otyrǵandyǵyn eskerip túsinistik tanytttyq", - dedi Erlan Jańabaev.
Oblystyq ákimshilik polısııa basqarmasy basshysynyń mindetin atqarýshy Aıbek Qulmaǵanbetov jyl basynan beri aımaqta atqarylyp jatqan reıdtik tekserýler týraly aıtty.
"QR Ishki ister mınıstrliginiń tapsyrmasyna sáıkes 2018 jyldyń 22 qańtarynan 18 aqpan aralyǵynda "Avtobýs" sharasy ótkizildi. Nátıjesinde 1408 zań buzýshylyq anyqtaldy. 27 aqpan men 1 naýryz aralyǵynda jergilikti polısııa qyzmeti, oblystyq jolaýshylar kóligi jáne avtobomıl joldary basqarmasy jáne kóliktik baqylaý ınspeksııasymen birigip reıd ótkizdik, tasymaldaýshylarǵa túsindirme jumysyn júrgizdik. Nátıjesinde 5 zańsyz tasymaldaýshy aıyppul tóledi. Olardyń isi respýblıkadaǵy qoldanystaǵy zańnamaǵa sáıkes sanksııamen sotqa joldandy", - dedi Aıbek Qulmaǵanbetov.
