Oblystyq Tótenshe jaǵdaılar departamenti baspasóz qyzmetiniń taratqan málimetterine súıensek, qazirgi ýaqytta aımaqtaǵy 6 jeke úı men 25 aýlany sý basqan. Naqtyraq aıtsaq, О́skemende 4 úı men 14 ýchaskeni, Aıagóz aýdanynda 2 úı men 6 ýchaskeni, Ulan aýdanynda 5 aýla aýmaǵy jańbyr men erigen qar sýynyń astynda qalǵan. Qazirgi ýaqytta Tótenshe jaǵdaılar departamentiniń 186 qyzmetkeri, 46 tehnıkasy men 17 sý sorý qurylǵysy tilsiz jaýmen kúres júrgizýde. Úıler men aýlalardaǵy sýdy sorý, qum tógý, bekitý jumystary qolǵa alynýda. Zardap shekken eshkim joq.
Ulan aýdany aýmaǵynan ótetin «О́skemen-Almaty» baǵytyndaǵy respýblıkalyq mańyzdaǵy joldyń 2 ýchaskesinde qar sýy jol ústine jaıylyp ketken. Qazirgi ýaqytta «Qazaqavtojol» mekemesiniń qyzmetkerleri joldy bekitý jumystaryn júrgizip jatyr.
Oblys ortalyǵy – О́skemende turǵyn úılerdiń aýlalary men jeke menshik úılerdi sý basýmen qatar qalanyń ortalyq kósheleri de kólkigen qar sýynyń astynda qalǵan. Shahar shetindegi Krasına, Babkına melnısa, Kemejaı, Ablaketka kentteriniń turǵyndary tilsiz jaýmen túni boıy arpalysqandaryn aıtyp, shaǵymdanýda. «Sýǵaralar durys jumys istemeıdi. Aýa-raıynyń boljamynan barlyǵy habardar, sonyń saldaryna daıyn bolý kerek emes pe? Jylda osy», - deıdi ashýǵa mingen Krasına kentiniń turǵyndary.
О́skemen qalasynyń TJB baspasóz qyzmetiniń mamany Marına Lıskova bir túnde 300-ge jýyq qońyraý shalynǵanyn, qutqarý jumystary tynymsyz júrgizilip jatqanyn habarlady. «Bárin bilip otyrmyz. Túni boıy turǵyndardan habarlamalar túsip jatyr, qyzmetkerler jumys isteýde. Kómek qajet bolsa, eki jeli ashyq tur. О́skemendikter 138 telefonyna, oblys turǵyndary 112 nómirine habarlasa alady», - deıdi ol.
Azamat QASYM,
«Egemen Qazaqstan»
Shyǵys Qazaqstan oblysy
Sýretter oblystyq Tótenshe jaǵdaılar departamenti baspasóz qyzmetinen alyndy
