Jaqynda ǵana áleýmettik jeliler men sport saıttarynda kóptegen aqparat jaryq kórdi. Onyń eń aldy «Astana Pro Team» velokomandasynyń bas menedjeri Aleksandr Vınokýrovpen baılanysty edi. Veloujymnyń basshysy qarjynyń jetispeı jatqanyn alǵa tartyp, komandanyń jabylyp qalý qaýpi bar ekenin aıtty. Olımpıada chempıonynyń sózine sensek, 2018 jyldyń alǵashqy aılarynda komanda ótken jyldan únemdegen qarjyǵa kún kóripti. Endi ol aqsha taýsylyp, jaqyn arada shabandozdar jalaqysyz qalatyn túri bar. «Jyl basynan beri Oman týry men Valensııa jáne Andalýsııa Výeltalarynda top jardyq. Qazaqstan atyn álemge tanytyp júrmiz. Osy kezge deıin jetken jetistigimizdiń 30 paıyzyn qazaqstandyq shabandozdar ıelendi. Bul elimizdegi velosporttyń damyǵanynyń kórinisi. Osyndaı komandaǵa qarjy der kezinde berilmese, barlyǵynan aıyrylǵaly turmyz», dep baıbalam saldy Vınokýrov.
Alǵashqyda qoǵamdyq pikir asa órshı qoıǵan joq. Jyl basynda qarjy ýaqtyly túspeı, sál keshigýler bolatyny qalypty jaǵdaıǵa aınalǵaly qashan. Alaıda Vınokýrovtyń málimdemesi shyqqany sol edi, izin ala «Astana» fýtbol klýby da sóz aldy. Mysalǵa, klýbtyń atqarýshy dırektory Qaısar Bekenov bul qarjy tapshylyǵyn kórýimizdiń birinshi jyly emes deıdi. Komanda ótken jyly kórsetken keremet ónerine tıesili syıaqysyn almaǵan. «Kóptegen fýtbolshy aldynda qaryzymyz bar. Bulaı jalǵasa berse, klýb belshesinen qaryzǵa batyp, bonkrotqa ushyraıdy. Osynshama ýaqyt ter tógip, Eýropaǵa tanymal komanda qurǵan eńbegimiz bir kúnde jelge ushpaq», deıdi Qaısar Bekenov.
«Astana» men «Sportıng» oıynynan keıin komandanyń bas bapkeri Stanımır Stoılov ta osy máselege arnaıy toqtalǵan bolatyn. «Men óz bolashaǵym ǵana emes, klýbtyń erteńi úshin de qam jedim. Eger ózderi ýáde etken aqsha berilmeıtin bolsa, onda jyldar boıy jınaǵan abyroıymyz bir kúnde tógile salmaq. Odan keıin bul komandany basynan bastap qaıtadan jınaqtaý kerek. Endi ǵana qalyptasyp kele jatqanda, orta joldan taıqyp ketý maǵan da aýyr tıip otyr», dep kúńirendi.
Bolgarııalyq bapkerdiń, klýb basshylarynyń demeýshilerge ókpesi qara qazandaı ekenin ótken jyldan bilemiz. Alaıda shydamnyń da shegi jetip, shamasy fýtbolshylar men bapkerler ózderine ózge jumys qarastyrýdy bastaǵan sekildi.
Joǵaryda atalǵan klýbtardyń ózgeleri nege jumǵan aýyzdaryn ashpaı otyr degen oıǵa qalamyz. Onyń da bir sebebi bar kórinedi. «Astana» kásipqoı sport klýby qurylǵaly beri osy eki klýbtan ózgesi jarytyp nátıje de kórsetpegen. Iаǵnı qarjy surap, bas kóterýge dátteri shydas bermese kerek. «Astana» basketbol klýby óz alańynda 8 oıyn qatarynan utylyp, qurylǵaly beri pleı-off satysyn ańsap, VTB Biryńǵaı basketbol lıgasynyń máńgi baqı aýtsaıderine aınalǵan. «Astana Motorsports» rallı komandasynyń jaǵdaıy da belgili. Mundaı komanda bar ekenin kóptegen qazaqstandyq jankúıerler bile de bermeıdi. Ońtústik Amerıka men Afrıka joldarynda jortýyldap júrgen komanda «aıdalada aq otaý, aýzy-murny joq otaý» ispetti. Jaqyn arada «Samuryq-Qazyna» tarapy bul sporttyq klýb óz qyzmetin toqtatady dep aqparat taratty. Demek burynnan beri qyrýar qarjyny ıemdenip kelgen komandanyń jabylýy kásipqoı klýbqa jeńildik jasady.
Aıtpaqshy, klýb sapynda shógennen (at polosy) jáne qol dobynan da komandalar bar. Jańadan qurylǵan ujymdardan ázirge nátıje talap etip otyrǵan eshkim joq. Sebebi bastapqy jyly 1 mıllıon eýro kóleminde qarjy ketkennen soń, bul jobalardy qazir Prezıdenttik klýb esh qarjylandyrmaıdy. Alaıda bul klýbtar demeýshilerdiń arqasynda kún kórip keledi.
Shynyn aıtýymyz kerek, bastapqyda el abyroıyn kóterip, bedelimizdi asqaqtatatyn jarnamalyq jobalar sporttyq turǵydan da, ataq shyǵarý jaǵynan da qyzmet qylýy tıis edi. «Astana» fýtbol klýby men «Astana Pro Team» velokomandasynan basqalary negizgi múddeniń mańyna da jolamady. Endi jaqyn arada saraptamalyq-zertteý jumystarynan keıin kásipqoı klýb basshylary bir sheshimge kelýi tıis. Jyl saıyn jelge shashylyp jatqan qarjynyń esebi sol kezde belgili bolar.
Ermuhamed MÁÝLEN,
«Egemen Qazaqstan»
