Bar-joǵy 15 mınýttyń aınalasynda eki metrge jýyq tasqyn sýdyń astynda qalyp, kúl-talqany shyqqan úılerdiń turǵyndary áýelde ashýǵa erik berip, tipti keıbiri kózderine jas alyp, jergilikti ákimdikti syn sadaǵyna alǵanymen aımaq basshysy mán-jaıdy túsindirgennen keıin baryp kóńilderi ornyna túskendeı boldy. Oblys ákimimen birge sý alǵan úılerdi aralaǵanymyzda «Za lınıı» dep atalatyn shaǵyn aýdanda túıtkildi máselelerdiń az emes ekenin ańǵardyq. Turǵyndardyń biri «jergilikti ákimdik qaraılaspaǵan soń kópirdi óz kúshimizben salyp aldyq» dese, endi biri bul yqsham aýdanda sý, jaryq máselesiniń sheshimin tappaı otyrǵanyn alǵa tartty.
D.Ahmetov bir aılyq jalaqysyn aýdardy
Aıagózde áýelde 20, sosyn 40, keıin 100 úıdi sý basqany týraly habarlanǵan edi. Bul derek kún saıyn ózgerip, 14 naýryzdaǵy málimet boıynsha 189 úıge sý kirgeni belgili boldy. Ázirge ózgermegeni - múlde jaramsyz bolyp qalǵan 8 úı men apatty dep tanylǵan 10 úı. Jermen-jeksen bolǵan nemese qabyrǵalary jarylyp qulaýdyń az-aq aldynda turǵan úılerdi óz kózimen kórgen D.Ahmetov apatty dep tanylǵan baspanalar biraz kúnde 8 úıdiń kebin kııýi múmkin ekendigin jasyrmady. «Sál sabyr etińizder. Birde-bir turǵyn nazardan tys qalmaıdy. Arnaıy qurylǵan komıssııa 10 kún ishinde tıisti sheshim shyǵarady. Úıleri jaramsyz bolyp qalǵan turǵyndarǵa Aıagóz qalasynda salynyp jatqan 60 páterli úıden baspana beriledi. Nemese osy qaladan úı satyp alyp berý máselesin qarastyramyz. Úılerine sý kirgen, biraq turýǵa jaraıtyn baspana ıelerine de kómek kórsetiledi. Erteń oblystyq «Paryz» qorynan Aıagózdegi qalyptasqan jaǵdaıdy retteýge 50 mıllıon teńge qarjy aýdaramyz», - degen-di oblys ákimi 13 naýryz kúni turǵyndarmen kezdesýinde. Búgin óńirdegi tasqyn jaǵdaıyna oraı jýrnalısterge arnaıy brıfıng ótkizgen aımaq basshysy atalmysh qarajat saǵat 10-ǵa deıin «Aıagóz bolashaq» qoryna aýdarylǵanyn, bul aqsha baspanasyz qalǵan 8 turǵynǵa tez arada úı satyp alyp berýge jáne tasqynnan zardap shekken otbasylardyń qajettiligine jumsalatynyn jetkizdi. Sonymen qatar tabıǵattyń tosyn minezinen qıyn jaǵdaıdy bastan keship otyrǵan turǵyndarǵa kómek retinde óziniń aılyq jalaqysyn aýdarǵanyn da aıtty.
Qolymyzǵa tıgen sońǵy málimetterge júginsek, dál qazirgi ýaqytta Aıagózdegi №6 mektep janyndaǵy ınternatta 73 adam (onyń 42-si bala) ýaqytsha turyp jatsa, 70 adam týystaryn panalaýda. 217 turǵyn óz úılerine oralypty.
Danıal Ahmetov brıfıngte 10 naýryzdan bastalǵan tasqyn kezinde oblys boıynsha 229 úı (Aıagóz qalasy – 189, О́skemen qalasy - 24, Ulan aýdany - 5, Glýbokoe aýdany - 8, Zaısan aýdany - 2, Kúrshim aýdany – 1), 193 aýla men 110 saıajaı nysanyn sý basqanyn, apat kezinde 385 adam qaýipsiz jerge kóshirilgenin, qazir barlyq eldi mekender sýdan arylǵanyn, apattyq qutqarý jumystaryna 1070 adam men 308 tehnıka tartylǵanyn tilge tıek etti. «Árıne, munymen is bitti dep arqany keńge salýǵa bolmas. Dál qazirgi ýaqytta Tótenshe jaǵdaı qyzmetiniń mamandary 6 tikushaqpen áýeden baqylaý júrgizip, qaýipti degen jerlerdi anyqtaýda. Aıagóz ben Ulan aýdandarynyń ákimderi tótenshe jaǵdaı kezinde shıraqtyq tanytyp, turǵyndarǵa der kezinde eskertip, qaýiptiń aldyn aldy deýge bolady. О́skemendegi jaǵdaıdy ózderińiz de bilip otyrsyzdar. Úılerin sý alǵan turǵyndardyń narazylyǵy da oryndy. 10-15 adam jiberetin jerge 2 adam jiberilgen. Budan keıin jaǵdaı ýshyqpaǵanda qaıtsin? Demek, jaǵdaıdy ózimiz de qıyndatqanbyz. Tájirıbesiz basshylarǵa barlyǵyn eskertip otyrmaǵan meniń de kinám bar shyǵar», - dedi Danıal Ahmetov.
7 úı sý astynda qalyp otyr
13 naýryzda gazetimizde jaryq kórgen maqalada Shyǵys Qazaqstannyń alty birdeı aýdany (Aıagóz, Úrjar, Kúrshim, Ulan, Glýbokoe, Zaısan) aýdany men oblys ortalyǵy - О́skemen qalasynyń turǵyndary aıtyp kelmeıtin apatpen arpalysyp jatqanyn sóz etip edik. Oblystyq Tótenshe jaǵdaılar departamentiniń baspasóz qyzmeti Tarbaǵataı men Shemonaıha aýdandarynda da qarǵyn sý jurtty álekke túsire bastaǵanyn habarlady. Tarbaǵataı aýdanynda Bazar ózeni qardyń kúrt erýinen arnasynan asyp, Kóktúbek aýylyndaǵy 4 aýla men sharýashylyq ǵımarattaryna sý jaıylypty. Qazirgi ýaqytta aýdandyq tótenshe jaǵdaılar bólimi men jergilikti atqarýshy organdardyń kúshimen sýdy turǵyn úılerden alastatý sharalary qolǵa alynyp, qaýipti aýmaqqa ınertti zattarmen toltyrylǵan qaptar tóselip jatqan kórinedi. Oqıǵa ornynda 35 adam men 5 tehnıka jumys isteýde. Al Shemonaıha aýdanynyń Verh-Ýba aýylynda kúnniń jylynýynan 4 aýlany sý basyp ketipti. Qazir aryqtardan sýdy aǵyzý jumystary júrgizilip jatyr.
Oblystyq Tótenshe jaǵdaılar departamenti baspasóz qyzmetiniń sońǵy bergen málimetterine súıensek, qazirgi ýaqytta oblysta 7 úı sý astynda qalyp otyr. Onyń beseýi - О́skemende, ekeýi – Kúrshimde. Atalǵan aýmaqtarda sýdy sorý jumystary júrgizilýde. Oblys ortalyǵyndaǵy úılerinen ýaqytsha kóshirilgen 22 adamnyń 15-i qazir týystaryn panalap jatsa, jeteýi «Úlbi» áleýmettik qyzmet ortalyǵyn meken etýde.
Búgin úıleri tasqynnan zardap shekken adamdardyń bir toby ýaqytsha ornalastyrylǵan Aıagózdegi №6 mektep janyndaǵy ınternattyń dırektory Lázzat Moldashevaǵa telefon shalyp, jaǵdaıdy bildik. «Internatqa áýelgi kúni 37, ekinshi kúni 50 adam ákelindi, qazirgi ýaqytta 91 (onyń 52-i bala) kisi turyp jatyr. «Mundaǵy turǵyndarǵa tańerteńgi tamaqty ózimiz, túski jáne keshki tamaqty aýdannyń kásipkerleri berip jatyr. Aýdannyń turǵyndary qoldan kelgen kómekterin aıap jatqan joq. Alysta júrgen jerlesterimiz de kómek qolyn sozyp jatyr. Máselen, belgili ánshi Toqtar Serikov 100 myń teńgege azyq-túlik ónimderin berip jiberipti. Aýdandyq bilim bólimi tasqyn kezinde oqýlyqtary men kıim-keshekteri sý astynda qalǵan oqýshylardy mektep formasymen jáne oqýlyqtarmen qamtamasyz etti», - dedi ol.
Azamat QASYM,
«Egemen Qazaqstan»
Shyǵys Qazaqstan oblysy
Sýretti túsirgen Tileýbek ShAIаHMET
