Buryn bettesip kórmegen bul jańa úrdis el óńirlerine de tyń mindetter júkteıdi. Osy oraıda Premer-Mınıstrdiń orynbasary Asqar Jumaǵalıevtiń Aqtóbe oblysyna saparynyń basty maqsaty – «Sıfrly Qazaqstan» memlekettik baǵdarlamasyna sáıkes óńirde qolǵa alynǵan istermen tanysý bolǵanyn aıta ketken jón.
Birden aıtarymyz, óńirdegi ónerkásiptik kásiporyndar men aýyl sharýashylyǵy óndirisinde bul istiń alǵashqy aıaq alysy táp-táýir. Máselen óńir aýmaǵyndaǵy «Aıs» JShS taýarly-sút fermasynyń qyzmetimen tanysý barysynda Asqar Qýanyshuly munda ózge óńirlerge úlgi retinde usynarlyqtaı sıfrlandyrý isiniń oń mysaldary mol ekenine kózin aıqyn jetkizdi. Mundaǵy agroónerkásiptik úderister tolyǵymen avtomattandyrylǵan. Sondaı-aq iri agroqurylymda sıfrlandyrý úderisteriniń tıimdiligi qazirdiń ózinde alǵashqy nátıjesin berýde. Buǵan dálel, bir sıyrdan kúnine ortasha eseppen 25-30 lıtr sút saýylady. Kúnine 40-45 lıtrge deıin sút beretin sıyrlar da bar. Sıfrlandyrý baǵyttalǵan bastamalar sýarmaly egistik ónimdiligin bes esege deıin arttyrýǵa múmkindik berip otyr.
Aıtalyq, buǵan deıin mal azyǵyna qajetti júgeri súrleminiń ár gektarynan alynǵan ónim 100 sentnerden aspasa, búginde onyń mólsheri 480 sentnerdi quraıdy. «Aıs» JShS jańa tehnologııalyq jeliler eńbek ónimdiligin birneshe ese kóterýge, analyq sıyrlardyń jaı-kúıin tolyqtaı baqylaýǵa alýǵa múmkindik beredi. Aldaǵy kezde aımaqta «Aıs» taýarly-sút fermasy úlgisinde taǵy da 31 sharýashylyq qurylmaq.
Asqar Jumaǵalıev bul úderisterge oń baǵasyn bere kelip, sıfrly tehnologııany engizbeıinshe bir de bir shaǵyn, orta jáne iri bıznestiń órisi keńeıe qoımaıtynyn atap kórsetti. Sondaı-aq óńirde kásiporyndardy jańǵyrtý men sıfrlandyrýǵa jáne avtomattandyrýǵa baǵyttalǵan baǵdarlamalar da oń nátıjesin bere bastaǵany belgili bolyp otyr. Ári osy arqyly ónimderdi eksportqa shyǵarýǵa jańa múmkindikter ashylǵan. Onyń jarqyn mysalynyń biri Aqtóbe rels arqalyǵy zaýyty bolyp tabylady.
Árıne osyǵan qarap óńirde jańa aqparattyq tehnologııalardy engizý máselesinde eshqandaı kedergiler men problemalar joq deýge bolmaıdy. Ásirese óńirdegi bilim berý men densaýlyq saqtaý salalarynda bul iste birqatar kidiristerdiń oryn alyp otyrǵany eshkimge de qupııa emes. Mundaǵy birinshi másele ınternet jelisi jyldamdyǵy tómendiginen týyndaıdy. Tipti muny aıtpaǵanda, ınternet júıesinen múldem tys qalyp otyrǵan shalǵaıdaǵy eldi mekender de bar. Talshyqty optıkalyq jeliniń jetispeýi de biraz qolbaılaý týǵyzýda.
Osy máseleler jóninde aıtyp bergen Aqtóbe oblysynyń ákimi Berdibek Saparbaevtyń usynys-tilekterine oraı Asqar Jumaǵalıev óńirdiń barlyq eldi mekenderine keńjolaqty ınternet jelisin spýtnıktik qondyrǵylar arqyly jetkizýge Úkimet tarapynan qoldaý kórsetiletinin málimdedi. Qazirgi kúni óńir ekonomıkasy men áleýmettik salasyn sıfrlandyrý isinde oblysta keń aýqymdy baǵdarlamalar jasalyp, soǵan saı keshendi is-sharalar qolǵa alynǵan. Bul jóninde Asqar Jumaǵalıevke oblys ákiminiń orynbasary Qaırat Bekenov málimdedi.
Vıse-premer sapar qorytyndysynda, tutastaı alǵanda Aqtóbe oblysyndaǵy sıfrlandyrý máselesi boıynsha Elbasy Joldaýynda alǵa qoıylǵan mindetter deńgeıinde sheshimin taýyp kele jatqany jóninde túıin jasady. 14 naýryz elimizdiń Batys óńirlerinde jyldyń basy dep sanalyp, Kórisý kúni atalyp ótetinine oraı ol barsha aqtóbelikterdi osy ataýly kúnmen quttyqtady.
Temir QUSAIYN,
«Egemen Qazaqstan»
AQTО́BE
