Prezıdent azamattarǵa 7 paıyzdan aspaıtyn ıpotekalyq nesıeler berip, qaıtarý ýaqytyn 20-25 jylǵa sozý, sondaı-aq bastapqy jarnany 20 paıyzdan asyrmaý basty másele ekendigin aıtty. Turǵyn úı máselesi búgingi kúni ekiniń birin qynjyltatyn, tolǵandyratyn jaıt ekendigi málim. Al Elbasynyń osy turǵydan qoldaýy basym kópshilikke demeý bolmaq.
Elimizde jalaqysy az 2 mln-ǵa jýyq adamnyń ál-aýqatyn jaqsartý úshin salyqtyq júktemeni 10 paıyzdan 1 paıyzǵa tómendetý kózdelgen. Sáıkesinshe, mundaı betburys biraz otbasynyń jaǵdaıyn jaqsartýǵa kómegin tıgizgeli otyr.
Joǵary oqý oryndarynda jyl saıyn bólinetin 54 myń grant qosymsha 20 myńǵa kóbeıtiledi. Bul oqý oryndarynyń abyroıyn arttyryp jáne bilim salasynyń deńgeıin kóterip, damytýǵa sep bolar sózsiz. Ásirese stýdentterdi jataqxanamen qatamasyz etý olardyń sapaly bilim alýyna óte úlken áserin tıgizedi.
Aýyl sharýashylyǵyn damytý aıasynda shaǵyn jáne orta kásipkerlikke shaǵyn nesıeler berýdiń jeńildikteri de eldi qýantty. Shaǵyn nesıelerdiń kólemin 62 mıllıard teńgege jetkizý kóptegen máselelerdiń kúrmeýin sheshedi.
Elbasy óz baıandamasynda Qyzylorda – Jezqazǵan – Qaraǵandy – Temirtaý arqyly Astanaǵa deıin gaz qubyry magıstrali tartylsa, 2,7 mln adam kógildir otynnyń ıgiligin kóretinin aıtty.
Mine osy bes baǵdardy azamattarymyzdyń jaǵdaıyn jaqsartýǵa baǵyttalǵan tarıhı betburys retinde baǵalaımyn. Árıne bul úshin barlyq azamattar bir maqsat, bir múddemen alǵa umtylýlary tıis.
Ikram HAShIMJANOV,
«Dýstlık» ózbek qaýymdastyǵynyń tóraǵasy
