Bul máseleniń aýyl turǵyndaryn tolǵandyra bastaǵandyǵyna biraz ýaqyt boldy. Sebebi túsinikti, aýyldarda jyl ótken saıyn turǵyndar qolyndaǵy mal sany kóbeıip, osynyń nátıjesinde aýyl mańaıyndaǵy jaıylymdyq óris taryla túsýde. Buǵan aýyl mańaıyndaǵy jerlerdiń kezinde uzaq merzimge jalǵa berilip ketkendigi de áser etýde. Atalǵan zań jobasynda osy problemany sheshý joldary qarastyrylǵan. Ol qandaı joldar?
Osy suraqqa jaýap izdep Aýyl sharýashylyǵy mınıstrligi Jer resýrstaryn basqarý komıteti tóraǵasynyń orynbasary Gúljahan Bımendınaǵa habarlasqan edik.
– Jalpylaı aıtsaq, zań jobasynda halyqty tolǵandyratyn, osy boıynsha qurylǵan jer komıssııasynda talqylanǵan máseleler boıynsha ózgerister men túzetýler engizý qarastyrylyp otyr. Aýyldar mańaıyndaǵy jer telimderiniń máselesin sheshý de osyndaı úlken tórt ózgeristiń qataryna shyǵaryldy.
Zań jobasy ázirlenbes buryn biz aýyldar mańaıyndaǵy jerlerge qatysty zertteý, taldaý jumystaryn júrgizdik. Sol tusta kóptegen qatelikter 1993 jyldary aýyldardyń bas damý josparlaryn jasaǵan kezde jiberilgendigin ańǵardyq. Ol kezderi, árıne aýyldardaǵy mal sany azaıǵan tus edi. Sondyqtan aýyl mańaıyndaǵy kóptegen jerler jekemenshik qolyna berilmese de uzaq merzimge jalǵa berilip qoıylǵan eken. Endi osy problemany sheshý úshin aýyl mańaıyndaǵy jerlerdi memleket muqtajyna qaıta qaıtaryp alý normalary engizildi. Al qandaı jer telimderin qaıtaryp alý kerektigin jergilikti ákimdikterdiń ózi anyqtaıdy. О́ıtkeni jergilikti jer men halyqtyń problemasy eń áýeli solarǵa tanys qoı. Aýyl mańaıyndaǵy jer telimderi keri qaıtaryp alynǵan soń, ol jerlerdi aýyl turǵyndary birlesip paıdalanady. Bul jerler ekinshi ret eshkimge jalǵa nemese jekeshelendirýge berilmeıdi, – dedi Gúljahan Amangeldiqyzy.
Onyń aıtýy boıynsha, aldaǵy ýaqytta mundaı máselelerdi halyqtyń talap-tilegin eskere otyryp sheshý úshin teń jartysy jergilikti halyq ókilderinen, teń jartysy memlekettik organdar ókilderinen turatyn komıssııalar qurylyp, jumys isteıtin bolady. Qandaı jerdi jalǵa berip, qandaı jerdi satý konkýrsyna shyǵarýǵa bolatyndyǵyn, al qandaı jer memleket menshiginde qaldyrylatyndyǵyn mine, osy komıssııa anyqtaıdy eken.
Suńǵat ÁLIPBAI,
«Egemen Qazaqstan»
