Aımaqtar • 15 Naýryz, 2018

Patsha zamanyndaǵy pul (jádiger)

360 ret

kórsetildi

1 mın

oqý úshin

Jambyl oblysy, T.Rysqulov aýdanyndaǵy mýzeıdiń ǵımaraty óńirdegi eń kóne nysandardyń birinen sanalady. Áýeli poshta beketi, odan keıin orys-túzemdik mektep, ári qaraı Lýgovoı orys mektebi bolǵan ǵımarattyń salynǵanyna 117 jyl bolypty. Al 2015 jyly 1 mamyrdan bastap Jambyl oblystyq tarıhı-ólketaný mýzeıiniń T.Rysqulov aýdandyq bólimshesi osy ǵımaratqa kóshirildi.

Egemen Qazaqstan

Ámire Sultanbekovtiń bastamasymen 1983 jyly qoǵamdyq negizde aýdandyq mýzeı qurylyp, ol jerge úsh myńnan astam jádiger jınalady. T.Rysqulov aýdandyq mýzeıiniń meńgerýshisi Esnazar Qurymbaevtyń aıtýynsha, búginde mádenı mekemede halqymyzdyń tereń tarıhynan syr shertetin, este joq eski zamandardyń kýágeri ispetti toǵyz myńnan astam jádiger bar.

Árıne, ol jádigerlerdiń kim-kimdi de qyzyqtyrmaı qoımasy anyq. Deı turǵanmen, munda kelýshilerdi patsha zamanyndaǵy aqshalar qyzyqtyrady eken. Máselen 1909, 1917, 1918 jyly shyqqan kóne puldar áli kúnge deıin osy jerde saqtaýly. Zamanynda baılardyń, kópesterdiń qaltasynda qobyrap júrgen aqshalar búginde tarıhqa aınalyp, jádiger esebinde mýzeı tórinde tur. Bul kúnde ábden tozyǵy jetken aqshalar tarıh qoınaýyna sińip, mekemeniń qymbat qazynalarynyń biri retinde saqtalǵan.

Hamıt ESAMAN,

«Egemen Qazaqstan»

Jambyl oblysy