- Elbasynyń bes áleýmettik bastama týraly úndeýin talqylaý Batys Qazaqstan óńirinde de qyzý júrip jatyr. Jurtshylyq bul pikirtalastarǵa belsene qatysýda. О́ıtkeni bul bes baǵyttyń halyqqa bereri kóp. Batysqazaqstandyqtar Elbasy usynǵan bastamany tolyǵymen qoldaıdy, - deıdi Batys Qazaqstan oblysy Qazaqstan halqy Assambleıasy Qoǵamdyq kelisim keńesiniń basshysy Medǵat Hambetov.
Batys Qazaqstan oblysynyń Qazaqstan halqy Assambleıasy tóraǵasynyń orynbasary, hatshylyq meńgerýshisi Ǵaısa Qapaqovtyń jetekshiligimen ótken keńeıtilgen otyrysqa qatysýshylar da biraýyzdan bul bastamalardyń mańyzy zor ekenin aıtty.
- Bul bes baǵyttyń árbir qazaqstandyqqa qatysy bar. Mysaly, stýdentti jataqhanamen qamtýdyń ózi – oqımyn degen jasqa qoldaý ǵana emes, onyń aýyldaǵy ata-anasyna da kómek. Mysaly, balasyn aqyly oqytyp, jylyna biraz qarjy jumsap otyrǵan adam ári páter jaldap shyǵyndanatyn. Elbasy tapsyrmasyna sáıkes Qazaqstanda stýdenttik jataqhana máselesi 2020 jylǵa deıin sheshilýi kerek, - dedi óz sózinde Ǵaısa Qapaqov.
Keńeıtilgen otyrysta sóz alǵan sheshen-ıngýsh etnomádenı birlestiginiń tóraǵasy Danılbek Saratov, Oral qalasy shaǵyn aýdandary qoǵamdyq kelisim keńesteriniń múshesi Samıǵolla Ádıev óz oıyn ortaǵa saldy. Edil-Jaıyq qazaq qaýymdastyǵynyń tóraǵasy Amanjol Zeınýllın ásirese shaǵyn kásipkerlikti damytý máselesine aǵa býyn, ulttyq birlestikter ókilderi de atsalysý qajettigine toqtaldy.
- Prezıdent úndeýinde jalaqysy tómen azamattardyń salyǵyn azaıtý, shaǵyn kásipkerlikti damytýǵa memlekettik qoldaýdy artyrý týraly aıtylǵan. Bular – birimen biri baılanysty, óte ózekti máseleler. Bul bastamalardy memleket tarapynan qarjylaı qamtý da naqty kórsetilgen, endi qoǵamnyń ózi qozǵalýy kerek. Jasyratyny joq, bidiń halyqta jalqaýlyq, marǵaýlyq bar. Jas býynnyń bolashaǵy úshin kásipkerlik daǵdyny damytý, básekelestikke umtylý týraly jatpaı-turmaı aıtýymyz kerek. Oılap qarańyzshy, búginde Qazaqstanda 1 bólmeli páterdiń baǵasy 7 mln teńgedeı bolady eken. Ony «7-20-25» baǵdarlamasyna sáıkes 25 jylǵa bólgenniń ózinde aıyna 50 myń teńge tóleýi tıis. Az jalaqyly, 60 myń teńge jalaqy alatyn adamnyń páter alý múmkindigi báribir shekteýli. О́z oıymsha, halyq shaǵyn kásipkerlikke berilip jatqan nesıeni paıdalanýy kerek. Elimizde qurylys qarqyndy, biraq buranda, shege shyǵaratyn seh joq. Al ony bólmeniń bir buryshynda turatyn shaǵyn stanokpen de jasaýǵa bolady. Mine, osyndaı isterdi nege kóbirek qolǵa almasqa, – deıdi Amanjol Zeınollauly.
Qazbek QUTTYMURATULY
«Egemen Qazaqstan»
Oral
