Spıkerdiń aıtýynsha, mınıstrlik «Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý» úshinshi bastamasyn iske asyrý boıynsha jumystardy bastady. Máselen, atalǵan mindetti iske asyrý mehanızmderin aıqyndaý maqsatynda Ulttyq ekonomıka mınıstrligi, JOO-lar, Ulttyq bank, ekinshi deńgeıli bankter, jeke qurylys salýshylar ókilderimen keńester ótkizildi.
«Stýdent jastardyń ómir súrý jaǵdaılaryn jaqsartý máselesin jekemenshik resýrstardyń, onyń ishinde joǵary oqý oryndarynyń, kolledjderdiń, ınvestorlar men basqa da seriktesterdiń resýrstary esebinen sheshý kózdelip otyr», — dep naqtylady vıse-mınıstr.
Atalǵan mehanızmniń joǵary oqý oryndary, kolledjder men ınvestorlar úshin tartymdylyǵy jataqhanalar salýǵa baǵyttalǵan ınvestısııalardyń bir bóliginiń memleket tarapynan birtindep qaıtarylýymen kepildendirý esebinen aqtalatyn bolady. Sonymen qatar, joǵary oqý oryndarynyń, kolledjderdiń nemese jeke seriktestiń jer telimi bolmaǵan jaǵdaıda, jergilikti atqarýshy organdar ınjenerlik-kommýnıkasııalyq ınfraqurylymdardy júrgizýmen jer telimin bóletin bolady.
Bıbigúl Asanova aıtyp ótkendeı, qazirgi kezde «Qazaqstan Respýblıkasynyń keıbir zańnamalyq aktilerine stýdent jastardyń ómir súrý jaǵdaılaryn jaqsartý, sonymen qatar jan basyna shaqqandaǵy normatıvtik qarjylandyrý máseleleri boıynsha ózgerister men tolyqtyrýlar engizý týraly» zań jobasy ázirlenip jatyr. Jaqynda ol múddeli memlekettik organdarmen kelisýge jiberiletin bolady.
Jobany iske asyrýdyń aldyn-ala shemasy kelesideı:
- JOO, kolledj nemese jeke seriktes jataqhana jobasyn ázirleıdi. Odan soń «Qarjy ortalyǵy» AQ-men kelisimshart jasalady.
- Ekinshi kezeńde kelisimshart negizinde bankten nesıe alyp, qurylys salýshyny jaldap, jataqhanany salady. Eger jataqhanany salsa, onda ol paıdalanýǵa berilgen kúnnen bastap bir jatyn orny úshin aı saıyn tıisti somany alyp otyratyn bolady.
«Bankter, JOO-lar men qurylys salýshylar usynylyp otyrǵan shemamen aldyn-ala kelisip otyr. Ekinshi deńgeıli bankterdiń málimetteri boıynsha, teńgeniń ótempazdyǵy jetkilikti. Sonymen qatar kásipkerlerdiń arzan zaemdyq resýrstarǵa, onyń ishinde sheteldik qarjy ınstıtýttarynyń resýrstaryna qoljetimdiligi máselesi qarastyrylyp jatyr», — dep túıindedi B. Asylova.
Jýrnalısterdiń jańa jataqhanalardyń salynýy oqý aqysynyń kóterilýine yqpal etpeı me degen saýaldaryna jaýap bere otyryp, B. Asylova stýdentterdi jataqhanalarmen qamtamasyz etý oqý aqysyna esh áserin tıgizbeıtinin aıtty. Budan ózge, QR BǴM jataqhanalar qurylysy jobalaryn arzandatý baǵytyn ustanýdy kózdep otyr, sebebi búgingi tańda usynylǵan jobalardyń baǵasy birshama kóterińki.
Qazirgi tańda elimizdegi JOO-larda 530 myń stýdent bilim alady, onyń ishinde 204 myńy (38%) — basqa qalalardan kelgen, jataqhanalarǵa muqtaj stýdentter. Prezıdenttiń bes áleýmettik bastamasyna sáıkes 2022 jylǵa qaraı stýdentter jataqhanalarynda jańa 75 myń oryn engizý qamtamasyz etilýi tıis.
