Atalǵan Úndeýde árbir otbasyna baspana alýdyń jańa múmkindikterin berý, jalaqysy tómen jumysshylardyń eńbekaqysyn kóbeıtý úshin olardyń salyq júktemesin azaıtý, joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý, shaǵyn nesıe berýdi kóbeıtý jáne eldi gazben qamtamasyz etýdi jalǵastyrý máseleleri qamtylǵan bolatyn.
Elbasy Úndeýin halyqqa túsindirý boıynsha Qazaqstan halqy Assambleıasynyń Biryńǵaı kúni aıasynda Taraz qalasyndaǵy «Dostyq úıi» ǵımaratynda dóńgelek ústel ótti. Atalǵan sharaǵa Qazaqstan halqy Assambleıasynyń músheleri, óńirdegi etnomádenı birlestikterdiń tóraǵalary men ókilderi, analar, aqsaqaldar jáne Qoǵamdyq kelisim keńesteriniń músheleri, sondaı-aq «Qoǵamdyq kelisim» kommýnaldy memlekettik mekemesiniń qyzmetkerleri qatysty.
Dóńgelek ústeldi Jambyl oblysy Qazaqstan halqy Assambleıasy hatshylyǵynyń meńgerýshisi Marjan Qojaeva ashyp, júrgizip otyrdy. Elbasy Úndeýinde kórsetilgen bastamalar boıynsha Qazaqstan Respýblıkasy Ulttyq banki Jambyl oblystyq fılıaly ekonomıkalyq taldaý jáne statıstıkalyq bóliminiń basshysy K.Qyrǵyzbaeva jáne «Qazaqstannyń Turǵyn úı qurylys jınaq banki» AQ Jambyl oblystyq fılıaly bıznesti damytý bóliminiń basshysy B.Quttybaev «Árbir otbasyna baspana alýdyń jańa múmkindikterin berý», M.H.Dýlatı atyndaǵy Taraz Memlekettik ýnıversıteti zań fakýltetiniń dekany Q.Nurmanbetov «Jalaqysy tómen jumysshylardyń eńbekaqysyn kóbeıtý úshin olardyń salyq júktemesin azaıtý» jáne «Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý», «Asatý» JShS-niń dırektory B.Jetpisbaev «Shaǵyn nesıe berýdi kóbeıtý», «QazTransGazAımaq» AQ Jambyl óndiristik fılıaly óndiristik tehnıkalyq bóliminiń basshysy A.Iýsýpov «Eldi gazben qamtamasyz etýdi jalǵastyrý» máseleleri boıynsha baıandamalar jasap, óz oılaryn aıtty. Sondaı-aq dóńgelek ústelge qatysýshylar Elbasy Úndeýi boıynsha óz pikirlerin bildirdi.
Hamıt Esaman,
«Egemen Qazaqstan»
Jambyl oblysy
