Vedomstvo basshysy keltirgen derekter boıynsha óńir 2016-2019 jyldarǵa arnalǵan «Densaýlyq» memlekettik baǵdarlamasyn júzege asyrýda kósh sońynda keledi. Respýblıkalyq kórsetkishtermen salystyrǵanda júrek-qan tamyrlary aýrýlary – 9, analar ólimi – 18, balalardyń shetineýi – 13, jaraqattar men tamaqtan ýlaný 56 paıyzǵa kóp. Sondyqtan turǵyndarǵa medısınalyq kómekter berý men uıymdastyrýdaǵy olqylyqtardy, ıaǵnı jyldar boıy qordalanǵan problemalardy jedel ári keshendi túrde sheshý mindetteldi. Mınıstr bir aıdyń ishinde aımaqtyq jospardy qaıta qarap, túzýdi, barlyq bas dárigerler men orynbasarlardy attestasııadan ótkizetin baqylaý keńesin qurýdy tapsyrdy. Aımaqtarda tolyq elektrondy qujat almasý formaty engizilip jatqany, munyń ózi kórsetiletin qyzmetterdiń sapasyn arttyrýǵa, qaǵazbastylyqty azaıtýǵa eleýli yqpal jasaıtyny atap ótildi. El bıýdjetiniń 11 paıyzy densaýlyq saqtaý salasyna baǵyttalady. Onyń 60 paıyzy stasıonarlyq medısınalyq kómek berýge jumsalady. Bıyl tegin dári-dármek satyp alýǵa 1 mıllıard 300 mıllıon teńge qarastyryldy. Saqtandyrylmaǵan azamattardyń sany úsh mıllıonǵa jýyqtyǵy eskerilip, júıeni engizý bir jylǵa shegerildi. Reseıde tegin medısınalyq qyzmet alý tiziminde 36-38 naýqas túri qamtylǵan. Keı memleketterde onshaqty ǵana. Qazaqstanda 263-ke jýyqtaıdy. Aldaǵy ýaqytta dıspanserlik tizimge enetin keselder qaıta resimdelip, on esege deıin qysqaratyn bolady deı kelip, E.Birtanov oblystaǵy 11 kóp salaly aýrýhananyń eskirgenin, 500 tósektiń bos turatynyn, budan bylaı shaǵyn emdeý oryndary salynbaıtynyn, 400 tósekten kem bolmaıtynyn, sonda tolyq qýatynda jumys istep, em-dom alý arzanǵa túsetinin aıtty. Oblysta 700 tósektik aýrýhana turǵyzý maqsatymen qarajat kózderi izdestirilip jatqanyn jetkizdi.
Densaýlyq saqtaý salasynda túıtkildi jaıttardyń jetip-artylatynyn oblys ákimi de rastady. Buǵan №1 qalalyq emhanaǵa esh eskertýsiz barǵanda kóz jetkizipti. Emdelýshiler uzyn-sonar kezekte turýǵa májbúr, saǵattap tosatyn jaıttar az kezdespeıdi. Áleýmettik jeliler arqyly da renishter kóp túsip jatady. Budan bylaı dárigerlerdiń jumysy elektrondy júıe arqyly baǵalanady. Oblysta bir ǵana balalar gematologi bar. Qalada balalar kardıologi, allergolog dáriger joq. Onyń bir sebebi baspana jaıyna kelip tireledi. Osy sebepti adamdardyń Reseıge baryp emdelýlerine, al bilikti mamandardyń basqa jaqtarǵa qonys aýdarýlaryna týra keledi.
Mınıstr M.Qozybaev atyndaǵy SQMÝ-da medısınalyq fakýltettiń ashylýyn quptap, memlekettik tapsyrys berýge ázir ekenin málimdedi. Oblystyq aýrýhanada, onkologııalyq dıspanserde, jedel qyzmet kórsetý ortalyǵynda bolyp, halyq densaýlyǵyn jaqsartýǵa arnalǵan sharalarmen tanysty.
О́mir ESQALI,
«Egemen Qazaqstan»
Soltústik Qazaqstan oblysy
